DILI, STLTIMORLESTE.com – Deputadu husi Bankada FRETILIN, Antoninho Doutel Sarmento fo sai katak, hahalok ukun nain sira neebe la kumpri promesa iha tempu kampanha eleitoral ikus mai fila duni povu obrigatariu la ho umanismu ida nee, sala boot hasoru Direitus Umanus. Bainhira sira asume tiha poder maibe uza fali poder hodi haterus populasaun nia moris iha susar no mizeria nia laran.
Antoninho reafirma katak, bainhira ukun nain sira haluha tiha promesa neebe halo ba povu, ida nee loke dalan boot ba hahalok laloos sira atu buras iha sistema governasaun nia laran.
“Kuandu la konsege kumpri promesa sira iha kampanha, realidade mak fila fali haburas mafiozu, duni povu, no hamosu hahalok metan sira,” dehan Antoninho Doutel Sarmento ba STL, iha PN, Díli, Kinta (23/07/2026).
Nia salienta katak, promesa iha tempu kampanha laos liafuan mamuk, maibe kompromisu moral no polítiku ne’ebé tenke realiza atu hasae moris diak populasaun nian. Bainhira promesa sira ne’e la realiza, impaktu negativu sei monu fali ba povu kiik ne’ebé sai vítima husi hahalok la onesta sira iha governasaun nia laran.
Deputadu nee husu ba governu no lider polítiku sira hotu atu hanoin seriu ba interese povu nian, atu nunee hasees aan husi hahalok ‘mafiozu’ no hahalok metan sira neebe sobu konfiansa publiku no hatun ita nia dignidade estadu iha rai laran no iha mundu nia matan.
Iha parte ketak, Observador Polítiku husi Universidade Nasionál Timór Lorosa’e (UNTL), Samuel de Jesus konsidera katak, krítika husi parlamentar nee hatoo alarme seriu ba ukun nain sira, tanba promesa kampanha ne’ebé la realiza mak hamosu deziluzaun no hamenus konfiansa povu nian ba sistema demokrátiku.
Nia salienta katak, governu tenke foka ba ezekusaun programa ne’ebé ho transparensia no akontabilidade atu hasees an husi pratika ‘mafiozu’ no hahalok laloos sira neebe bele fo ameasa ba estabilidade no dezenvolvimentu nasional.
Entretantu Akademista UNTL, Eduardo da Costa hatoo katak, retorika polítika ne’ebé la ho fundamentu no la hatudu realidade fo impaktu deit ba kualidade demokrasia no hamosu desinterese iha publiku nia klaran.
Nia reforsa katak, tempu too ona ba sosiedade sivil no publiku atu ezije kontrolu ho rigorozus liu tan ba programa no orsamantu estadu nian, atu garante katak ukun nain sira kumpri duni promesa ba povu no laos fali kria rede ‘mafiozu’ neebe ho kbiit boot liu fali interese populasaun nian.
(car)
