DILI, STLTIMORLESTE.com – Ministeriu Ensinu Superior Siensia no Kultura (MESSK) liu husi Diresaun Nasional Legalizasaun iha 2025 legaliza diploma hamutuk rihun 25, no iha Janeiru too Junhu 2026 hamutuk rihun 13.
Diretor Diresaun Nasional de Legalizasaun, Sergio Elidio Borges de Deus hatete, legaliza diploma nee primeiru bazeia ba de manda iha mak servisu applay vaga. Ema mai halo legalizasaun nee loron ida bele atende too 300, kiik liu iha tempu baibain normal mak 100. Mais kuandu iha vaga ruma loke, loron ida bele atende too 300 no dala ruma mos servisu nee halo la fila uma, bele Sabadu no Domingu nafatin servisu para fasilita maluk sira nia presiza legaliza. Tanba vaga neebe loke ho nia limitasaun tempu, entaun tenke fasilita sira.
Nia afirma, iha 2025 legaliza hamutuk rihun 25, no 2026 husi Janeiru too Junhu hamutuk rihun 13.
“Iha 2025 legalizasaun diploma hamutuk rihun 25 no 2026 husi Janeiru too Junhu rihun 13. Nee kobre ho sira neebe mak eskola iha rai liur hanesan Portugal, Brasil, Xina, Korea, Kamboza, Filipina, nee sira hotu mai iha nee,” dehan nia ba STL iha nia servisu fatin MESSK Colmera, Kinta (23/07/2026).
Nia katak, durasaun tempu ba legalizasaun nee bazeia ba volume maluk sira neebe mai, kuandu barak liu nee loron 3 mak foin foti maibe kuandu normal hela nee ohin hatama aban foti kedas.
“Maioria barak mai nee ho nia objetivu legaliza neemak buka servisu. Sira neebe kontinua estudu nee oituan deit,” nia tenik.
Nunee mos Graduadu UNTL, Jezuina Justina Ximenes Pereira dehan, mai iha MESSK hodi legaliza diploma nee tanba husi universidade mak haruka mai. Aleinde nee mai legaliza hodi prepara hela bainhira loke vaga ruma hodi applay ba servisu. Legaliza diploma nee importante tebes.
“Hau sente importante tebes legaliza diploma nee,” dehan nia.
Nia hatutan, durasaun foti fali diploma legaliza nee loron 3 mak foti.
Nunee mos Graduadu UNTL, Mario Augostu da Costa Correia hatete, ohin mai atu legaliza diploma, nunee bele konkore ba vaga ruma neebe bainhira iha publikasaun liu husi jornal, TV no media sosial sira.
“Bainhira ita hetan bele konkore ba vaga nee. Neebe diak liu legaliza antes bainhira vaga nee loke hein tuir deit. Legalizasaun nee importante tebes tanba tenki legaliza, atu nunee bele rekonese husi governu liu husi MESSK nian,” nia tenik.
Nia hatutan, foin mak mai halo legalizasaun iha nee, prosedimentu sira lalais no atendimentu mos diak.
(dom)
