DILI, STLTIMORLESTE.com – Padre Paul Kerans, SVD hatete, rikusoin neebe boot no lori ksolok halo orasaun loron-loron no moris tuir Maromak nia hanorin husi aiknanoin evanjelhu nia.
Padre Paul Kerans, SVD hatoo kestaun nee ba STL Segunda (27/07/2026) hatete, rikusoin nee boot ba ema idak idak mak halo tuir ukun fuan Maromak nia, hadomi malu, respeita malu, tuir Maromak nia hanorin sira.
Padre dehan, evanjelhu neebe iha domin mos foti Mateus 13:44-52 hatete iha deit rikusoin ida neebe lori ksolok, no rikusoin nee maka mai husi Jesus. Ai knanoik iha Evanjelhu ohin nian konaba ema ida neebe hetan rikusoin neeba (reinu lalehan nian) no sai ho ksolok (Mateus 13:44).
“Ita mos hahu viajen ida atu hetan rikusoin ida nee? No ita presiza mapa ida? Sim, ami halo viajen ida nee maka viajen ida ba ita-nia fuan rasik, no mapa nee maka fo mai ita husi Jesus rasik. Iha ai knanoik rua dahuluk iha Evanjellu ohin nian (Mateus 13:44-46), mane sira faan buat hotu neebe sira iha hodi hetan rikusoin subar no perola furak ida,” katak Pe.
Padre dehan, iha moris loron ba loron presiza buka Maromak hodi akompanha nafatin iha moris loron ba loron sai mahein iha ema idak idak nia moris.
“Buka Jesus no reinu lalehan signifika ita hasoru opsaun sira no tenke foti desizaun sira, dalaruma desizaun sira neebe susar ita la brani atu halo. Ita prefere rikusoin temporariu no tentador sira neebe la oferese ksolok lo-loos neebe ita hakarak duni,” dehan Padre.
Iha primeira leitura, Salomão rejeita rikusoin neebe bele dodok atu bele iha Maromak nia matenek atu hatene buat diak no buat aat (1Reis 3:5, 7-12). Jesus mak rikusoin loos neebe ema hetan hodi lori nia krus.
“Jesus mak rikusoin neebe lori ksolok neebe loos mai ita. Hodi lori ita nia krus, ita sei hetan perola iha ita nia laran, no perola nee maka Jesus. Ita tenke hahu viajen ida atu hetan rikusoin ida nee, Jesus? Ita presiza mapa ida? Sim, ami halo viajen nee maka viajen ida ba ita nia fuan rasik, no mapa nee fo ona mai ita husi Jesus rasik. Oinsa mak ita tenke hahu? Hodi reza, simu beibeik sakramentu sira, no lee ita nia Bíblia sira. Hau fiar katak ita ida reza laiha rohan. Tanba nee mak ita iha problema barak. Se ita hotu reza barak liutan, hau fiar katak problema barak sei rezolve no ita nia moris sei sai diak liutan,” katak Padre.
Padre dehan, bainhira reza loron-loron husu Jesus akompanha iha moris, fiar ba katak maske iha moris hasoru dezafiu oin oin maibe sei bele rejolve no hetan solusaun tanba Espiritu Santo nia servisu iha moris loron loron.
“Entaun, hodi reza, simu sakramentu sira, no lee Bíblia, ita sei hetan perola, Jesus. No Nia mak rikusoin neebe sei la dezanima ita. Hetan tiha ida nee, ita bele ba ho ksolok, hanesan ema iha ai-knanoik iha evanjelhu ohin nian. ( Mateus 13:44 ),” hakotu Padre.
(eme)
