DILI, STLTIMORLESTE.com – Prezidente Republika (PR), Jose Ramos Horta vizita Estadu dahuluk ba Republika Vanuatu, husi loron 28 too 30 Julhu, hodi partisipa iha selebrasaun loron Independensia Vanuatu nian ba dala 46.
Iha loron Segunda nee (27/07/2027), vizita Estadu nee reafirma lasu amizade no solidariedade neebe metin entre Timor Leste no Vanuatu Estadu Dezenvolvimentu Illa Kiik rua neebe unidu liu husi aspirasaun komun ba dezenvolvimentu sustentavel, reziliensia klimatika, no estabilidade rejional.
Vanuatu iha fatin ida neebe espesial iha Timor Leste nia memoria istorika. Durante Timor Leste nia luta ba autodeterminasaun, Vanuatu nuudar estadu illa pasífiku uniku neebe hamutuk ho TL.
Prezidente Ramos Horta sei too iha Port Vila iha loron 28 fulan Julhu no sei simu ho Guarda de Honra. Programa ofisial hahu ho Jantar boas-vindas neebe ofrese husi Ministru Negosiu Estranjeiru Vanuatu nian.
Iha loron 29 fulan Julhu, Prezidente sei halao serie enkontru ho alto nivel sira, hahu ho konversa sira ho Sua Exelensia Nikenike Vurobaravu, Prezidente Republika Vanuatu nian, tuir fali ho enkontru bilateral ho Primeiru Ministru Jotham Napat.
Programa sira inklui enkontru ho Prezidente Parlamentu, Hon. Stephen Felix.
Alende nee Prezidente RamosbHorta sei hatoo palestra publika iha Universidade Nasional Vanuatu no partisipa iha serimonia boas-vindas stradisionsl iha Chiefs Nakamal.
Iha loron 30 fulan Julhu, Prezidente sei partisipa iha Selebrasaun Loron Independensia Republika Vanuatu nian ba dala 46.
Durante vizita nee, Prezidente Ramos Horta sei konfere Ordem de Timor Leste ba líder Vanuatu sira nuudar rekonesimentu ba sira-nia kontribuisaun signifikativu ba Timor Leste.
Iha biban nee Prezidente Ramos Horta hatete, vizita ida nee fo kontinuidade hafoin reuniaun Konselhu Ministru neebe halao foin lalais nee iha loron 22 fulan Julhu, neebe aprova ona akordu entre Republika Demokratika Timor Leste no Republika Vanuatu konaba Programa Kooperasaun teknika ba Dezenvolvimentu.
“Akordu nee ho objetivu atu promove kooperasaun dezenvolvimentu iha area estratrjika sira, no estabelese mekanizmu sira ba kolaborasaun entre nasaun rua nee,” dehan PR Horta.
Prezidente Ramos Horta sei aranka husi Vanuatu iha loron 31 fulan Julhu ba Melbourne neebe iha loron 1 fulan Agostu Prezidente sei hamutuk ho komunidade Timor-oan sira hodi selebra Aniversariu ba dala 50 refujiadu Timor-oan sira dahuluk too iha rai Australia.
(eme)
