DILI, STLTIMORLESTE.com – Governu Australia no Timor Leste reafirma fali sira nia kompromisu atu apoia ajenda reforma ekonomia no instituisaun sira iha TL, liu husi faze daruak Parseria ba Prosperidade Inklusivu (Partnership for Inclusive Prosperity PROSIVU), tuir Reuniaun Komitée Diretivu (Steering Committee) anual programa nian neebe lidera hamutuk husi Ministra Finansas, Santina Viegas Cardoso, no Embaixadora Australia ba TL, Caitlin Wilson, iha loron 28 Julhu 2026.
Tuir Karta Komunikadu neebe STL asesu husi media Australia, Kuarta (29/07/2026) hatete, haree husi rezultadu importante sira neebe alkansa ona iha Faze primeiru (2022-2026), PROSIVU faze daruak (2026-2028) sei kontinua halo parseria ho Governu TL hodi apoia objetivu sira liu husi hametin instituisaun publiku sira, hadia jestaun ekonomia, moderniza administrasaun publika, fortalese jestaun finansas publikas no apoia integrasaun rejional neebe klean liu liuhusi ASEAN. Reforma sira-nee sei loke oportunidade ekonomia barak liu tan, hadia servisu publiku sira no asegura katak rekursu publiku sira fo benefísiu neebe sustentavel ba povu TL.
Embaixadora Australia ba TL Caitlin Wilson, hatete, faze daruak PROSIVU hatudu parseria metin no duradoura entre Austrália no TL, no sira-nia kompromisu hamutuk atu apoia prioridade dezenvolvimentu tempu naruk TL nian.
“Australia no TL iha parseria ida neebe metin no dura bazeia ba ita boot sira-nia kompromisu atu harii futuru ida neebe dame, estavel, prosperu no resiliente. Liu husi PROSIVU faze daruak, ita sei kontinua servisu hamutuk atu hametin instituisaun sira, haluan oportunidade ekonomia no apoia dezenvolvimentu inkluzivu neebe fo benefísiu ba povu Timoroan hotu,” dehan nia liu husi komunikadu nee.
Nia hatete, Governu Australia sei kontinua apoia reforma sira atu hametin ambiente negósiu iha TL liu husi promosaun investimentu no komersiu, dezenvolvimentu turizmu, rejistu negosiu online no koordenasaun reforma ekonomia. Iha faze daruak, programa nee mos sei apoia empoderamentu ekonomiku feto sira, servisu inkluzivu ba ema ho defisiensia no hadia koneksaun dijital. Prioridade importante ida mak ajuda TL atu hetan benefísiu husi membru ASEAN liu husi implementasaun Roteiru Komunidade Ekonomika ASEAN, kumpri padraun no kompromisu ASEAN sira, atrai investimentu no komersiu, no fornese formasaun lian Ingles ba funsionariu Governu sira.
Australia nia parseira ho Ministériu Finansas sei kontinua iha hametin jestaun finansas publikas atu asegura katak rekursu públiku sira uza ho efikásia hodi promove kresimentu ekonomia TL, kria oportunidade servisu no hadia servisu publiku sira. Servisu hamutuk ida-nee mos apoia reforma funsaun publika liuhusi apoiu estratéjiku ba Komisaun Funsaun Publika, hadia sistema sira no suporta dezenvolvimentu estratejia.
Nunee mos Ministra Finansas, Santina Viegas Cardoso agradese ba Governu Australia ba nia kompromisu ba servisu ida nee.
“Reprezenta Governu TL, hau hatoo hau nia agradese ba Governu Australia ba nia kompromisu ba servisu ida-nee. Hau konfia katak, liu husi kolaborasaun neebe kontinua no prioridade neebe klaru, PROSIVU faze daruak sei lori benefisiu real ba povu TL,” dehan nia
(dom)
