DILI, STLTIMORLESTE.com – Membru Komisaun B neebe trata asuntu Negosiu Estranjeiru, Seguransa no Defeza iha Parlamentu Nasionl (PN) husu Polisia Nasional Timor Leste (PNTL) no Polisia Sientifika Investigasaun Kriminal (PSIK) atu komunikasaun servisu hodi evita mosu dezentendimentu.
“Konkorensia hanesan nee tidak sehat, signifika sira nia boot sira la tur hamutuk para koordena ida nee halo saida, ida neeba halo saida, parese iha ona kada distribuisaun nee tarefas iha ona,” hatete Deputadu David Dias Ximenes ba jornalista sira iha sala Bankada FRETILIN, Kuarta nee (29/07/2026).
Nia hatutan, autoridade seguransa sira presiza komunikasaun hodi halo servisu iha terenu, tanba dezentendimentu sira wainhira akontese beibeik, ema sei aproveita hodi estraga estabilidade iha nasaun nee.
“Haree deit husi sira nia atuasaun nee diskute malu fali iha terrenu nee ladun diak, tanba hanesan Bahasa Indonezia dehan katak mudah di pengaruhi, entaun fasilmente ema influensia sira ho buat ruma, kuandu hanesan nee ona ema aat sira komesa koalia hanesan nee, kontra ida nee, ba fali ida neeba, entaun iha nee abuza situasaun,” nia preokupa.
Nia sublina, Ministeriu Interior ho Ministeriu Justisa labele abandona dezentendimentu nee no presiza tur hamutuk hodi buka solusaun liu husi atribuisaun servisu, nunee ba oin evita mosu dezentendimentu iha futuru.
“Se bele karik koalia lo-loos ba malu, sala nee iha neebe hadia tiha kedas, kuandu halo atividade ruma hein susesu maibe dala ruma retrosesu mosu tan saida mak halo, tanba nee ema iha frakeza, agora ida nee mak iha organizasaun para servisu enkonjunta katak hanoin nee tau hamutuk,” dehan nia.
Sorin seluk, Ministru Interior, Francisco Guterres da Costa reforsa katak, Ministeriu Interior koordena ona ho Ministeriu Justisa hodi buka rezolve lalais dezentendimentu membru PSIK ho PNTL.
“Ami agora buka hela rezolve kestoens instituisionais, neebe ami haree ona, prontu tanba kestoens sira nee, kestoens neebe presiza asegura lalais no koordenasaun servisu halo maibe mosu tanba individuais, iha parte leten Ministeriu ami koalia ona atu rezolve,” hatete Ministru Interior, Francisco Guterres da Costa.
Nia dehan, Ministeriu Interior ho Ministeriu Justisa sei hasai hamutuk manual hodi aprezenta ba Ministeriu Publiku, tanba sira mak titular ba prosesu hotu-hotu, no atu fo kompetensia ba se los mak atu haree servisu hodi haree ba krimi sira neebe iha.
“Tanba nee mak tenki artikula ho Ministeriu Publiku para depois Ministeriu Publiku atu fo servisu ba se mak atu halo, nunee bele rezolve tiha dezintendimentu neebe mak iha, no agora ami haree dalan iha ona, komunikasoens lao hela, neebe ita buka para rezolve,” dehan nia.
Nia mos dehan, ho dezentendimentu neebe iha, membru PNTL sira mos aprende no sei hadia fila fali sira nia hahalok hodi tau atensaun ba servisu loron-loron nia hodi asegura nasaun husi ameasa oin-oin.
(alb)
