DILI, STLTIMORLESTE.com – Lider husi nasaun rua Republika Demokratika Timor Leste ho Republika Vanuatu asina akordu kooperasaun ba dezenvolvimentu no izeinsaun vistu hodi hametin kooperasaun rai rua iha futuru.
Prezidente Republika, Jose Ramos Horta halao sorumutu bilateral ho Primeiru Ministru Vanuatu nian, Jotham Napat, iha loron Kuarta (29/07/2026) iha Vanuatu, hodi koalia konaba dezenvolvimentu sustentavel, reziliensia ba mudansa klimatika, no seguransa rejional.
Sorumutu nee akontese durante Prezidente nia vizita estadu istorika dahuluk, hodi reafirma solidariedade klean no istoria neebe fahe hamutuk entre Estadu Insular kiik iha Dezenvolvimentu rua nee.
Hafoin diskusaun nivel aas nee, nasaun rua nee asina akordu kuadru koperasaun ba dezenvolvimentu no akordu Izeinsaun vistu. Dokumentu istoriku sira nee asina husi Vise-Ministra Negosius Estranjeirus Timor-Leste, Jesuína Maria Ferreira Gomes, no Ministru Negosius Estranjeirus Vanuatu nian, Marc Ati, hodi estabelese mekanizmu formal ida ba kolaborasaun institusional estratejika.
Izeinsaun vistu foun neebe foin estabelese nee sei fasilita sirkulasaun livre ba sidadaun sira, hodi impulsiona makaas relasaun ekonomika, kultural, no umana entre parseiru Pasífiku rua nee. Prezidente Ramos Horta sei kontinua nia vizita hodi junta ho lider nasional no sidadaun sira iha loron 30 fulan-jullu atu selebra loron independensia Vanuatu nian ba dala 46.
Aleinde nee Prezidente Ramos Horta sei hatoo palestra publika iha Universidade Nasional Vanuatu no partisipa iha serimonia boas vindas stradisional iha Chiefs Nakamal.
Iha loron 30 fulan Julhu, Prezidente sei partisipa iha selebrasaun loron Independensia Republika Vanuatu nian ba dala 46.
Durante vizita nee, Prezidente Ramos Horta sei konfere Ordem de Timor-Leste ba líder Vanuatu sira nuudar rekonesimentu ba sira nia kontribuisaun signifikativu ba Timor Leste.
Prezidente Ramos Horta hateten vizita ida nee fo kontinuidade hafoin reuniaun Konsellu Ministru neebe halao foin lalais nee iha loron 22 fulan Jullu, neebe aprova ona akordu entre Republika Demokratika Timor-Leste no Republika Vanuatu konaba programa koperasaun teknika ba dezenvolvimentu.
Akordu nee ho objetivu atu promove kooperasaun dezenvolvimentu iha area estratrjika sira, no estabelese mekanizmu sira ba kolaborasaun entre nasaun rua nee.
(eme)
