DILI, STLTIMORLESTE.com – Dili Institute Technologia (DIT) daudaun nee sei nafatin ho eskola superior 4 ho departementu 11, husi eskola superior 4 nee ida neebe estudante barak liu mak iha jestaun negosiu bisnis no manajemen, ho departementu rua mak akuntabilidade ho jestaun finansa. Neebe kada tinan estudante pur volta 700, numeru nee instituisaun mak hapara no la kontinua simu tanba espasu sala menus.
Liafuan nee haktuir husi Reitor DIT, Dr, Salustiano dos Reis Piedade ba STL iha nia knar fatin edifisiu DIT Aimeti Laran, Kinta (30/07/2026).
Nia hatete, estudante sira barak tebes mak hakarak eskola iha nee, dala ruma sira nia familia, inan aman mai dehan hakarak sira nia oan atu eskola iha nee, maibe instituisaun tenke nakloke no honestu ba sira katak espasu sala mak la too, neebe tenke simu ho limitasaun.
Ita tenke nakloke no honestu ba sira katak ita nia espasu sala mak la too, neebe tenke simu ho limitasaun,” dehan nia.
Nia haktuir, DIT sei nafatin ho eskola superior 4 mak hanesan iha eskola superior siensia kultura iha departementu 3 mak hanesan enjineru civil, mekanik no siensia komputador. Eskola superior petroliferu iha departementu rua mak injanaria no jestaun. Eeskola superior jestaun negosiu iha departementu tolu mak hanesan jestaun finansia, akuntabilidade no jestaun jeral. Depois iha eskola superior turizmu no hospitalidade iha departementu 3 mak hanesan jestaun hotelaria, jestaun viazem no ikus liu mak hetan lisensa operasional husi MESSK loke tan departementu ida bolu english teaching and translate, neebe komesa lao tinan ida ona. Husi eskola superior 4 nee mak hamutuk departementu 11.
Husi eskola superior 4 nee, ida neebe mak estudante barak liu hakarak tama iha DIT nee mak iha jestaun negosiu bisnis no manajemen, ho departementu rua mak akuntabilidade ho jestaun finansa. Nee kada tinan instituisaun mak hapara hodi la kontinua simu, tanba sira barak mak hakarak eskola iha area ida nee. Maibe tanba espasu sala la too nee mak halo limitasaun tiha.
Nia afirma, neebe parese ba oin mak foin bele, agora daudaun sei harii tan edifisiu foun ba duni eskola superior negosiu bisnis no manajemen ba edifisiu andar 5, agora loke tan ida. Neebe ba oin nee bele fo tan oportunidade ba estudante sira para bele rejistu barak liu, agora nee limita hela.
Tuir fali mak eskola superior enjineria no siensia, ida nee mos estudante barak maibe normalmente tarjetu DIT nian hakarak kada departementu ida ema 150, nee kuaze departementu nee kobre.
“Nee ami limita mos por kauza ami nia despaisu ba sala sira mak llimitadu tebes. Totalmente DIT kada tinan simu estudante pur volta 1400, maibe bazeia ba esperiensia neebe iha dala ruma depois kuandu lao ona, estudante balun hakarak muda fali ba UNTL tanba sira nia naran sai iha UNTL, no balun hakarak kontinua ba rai liur. Entaun numeru nee bele redus mai 1300 neebe mak hela iha DIT nian. Ami sente katak numeru nee natoon ona ba DIT ho espasu sala neebe iha. Espasu sala menus maibe nia peminat barak, maibé ami mak limita, nee tanba inan aman investe nia oan sira tenke mai tur iha fatin neebe espasu natoon para aprende ho diak,” dehan nia.
Nia hatutan, tuir fali ikus liu mak eskola superior petroliferu ho jestaun turismu viazem, neebe uluk nee nia numeru estudante makaas liu, mais depois ikus-ikus nee numeru nee komesa redus daudaun. Tuir informasaun neebe DIT hetan mak liu-liu estudu petroliferu nee ligasaun ho kampu de trabalho, tanba atu servisu iha kompana mina buat laos fasil. Dala ruma kuota neebe kompania fo ba Timor oan mos menus tebes. Ida neemak problema ida ba sira, maske laos sira nia servisu area spesifiku duni, maibe sira nafatin hetan servisu iha fatin seluk.
Estudante enjineiru civil DIT, Nandito hatete, nia parte hakarak kontinua nia estudu iha area ida nee tanba nia mai husi eskola tekniku vokasional. Neebe liu husi area ida nee nia bele dezenvolve aan diak liu tan ho siensia neebe hetan iha area ida nee liu husi teoria no pratika, atu nunee ba futuru bele kria rasik kampu trabalhu ho buat neebe hetan iha eskola superior ida nee.
Entretantu Graduadu UNTL, Marsal da Costa hatete, alin sira neebe remata husi eskola sekundariu bainhira atu kontinua ba iha banku eskola superior nian presiza hanoin didiak konaba area neebe atu kontinua ba. Tanba area balun mak la relevante ho situasaun iha rai laran nian, liu-liu kona ba kampu trabalhu. Dala barak halo graduadu balun tenke halai ses husi sira nia area espesifiku, hodi servisu fali ba iha area seluk.
(dom)
