DILI, STLTIMORLESTE.com – Primeiru Ministru (PM), Kay Rala Xanana Gusmão deklara katak, papel organizasaun intergovernamental g7+ daudaun nee hahu hetan rekonhesimentu iha nivel internasional, tanba nia kontribuisaun iha promosaun paz, dialogu no akompanhamentu ba prosesu eleisaun iha nasaun sira neebe frajil.
“g7+ informa mai hau katak organizasaun ne’e laos deit akompanha eleisaun iha nasaun membru sira, maibe mos iha nasaun seluk. Papel g7+ iha mundu komesa hetan ona rekonhesimentu,” PM Xanana hateten iha Palasiu Governu, Kinta (30/07/2026).
PM Xanana esplika, g7+ daudaun nee akompanha eleisaun prezidensial iha São Tome e Principe, maske nasaun nee laos membru g7+, no mós iha Illa Salomaun, nasaun neebe atualmente kaer Prezidensia organizasaun nian.
Delegasaun ida husi Yemen sei mai Timor Leste iha fulan Agostu atu troka esperiensia ho Prezidente Republika, Parlamentu Nasional no Governu kona-bá prosesu harii Estadu, dialogu polítiku no rekonsiliasaun nasional.
Aleinde nee, g7+ sei organiza fila-fali Futsal Peace Cup iha Lisboa ho partisipasaun reprezentante husi nasaun membru g7+ no komunidade CPLP, atu promove amizade no paz.
PM Xanana mos informa katak g7+ sei partisipa nuudar observador iha Konsellu Ministru CPLP iha 19 Agostu, no mos iha konferensia internasional kona-ba paz nebe sei reune ema sira neebe simu Premiu Nobel da Paz.
Durante Assembleia Jeral Nasoins Unidas (ONU) iha Nova Iorque, g7+ sei organiza simeira ida ho lideransa husi Illa Salomaun, Republika Demokrátika Kongo, Liberia no Timor-Leste.
PM Xanana reafirma katak, g7+ sei kontinua defende reforma ba Konsellu Seguransa ONU atu bele responde diak-liu ba dezafiu seguransa no páaz iha mundu.
Iha 29 no 30 Setembru, g7+ sei partisipa iha dialogu internasional kona-ba páz iha Zenebra, Suisa, hodi fahe esperiénsia kona-ba dialogu, mediasaun no kooperasaun iha nasaun sira neebe frajil ka foin sai husi konflitu.
(alb)
