DILI, STLTIMORLESTE.com – Prezidente Republika (PR), Jose Ramos Horta oferese produtu lokal ba Hospital sira iha Vanuatu durante vizita estadu ba nasaun refere.
Durante vizita Estadu ba Nasaun Republika Vanuatu, Prezidente Republika Jose Ramos Horta vizita no sosa produtu lokal sira iha merkadu Port Vila hodi oferese ba pasiente sira iha Hospital sira iha Vanuatu.
Iha ambitu vizita Estadu ba Republika Vanuatu, Prezidente Republika, Jose Ramos Horta vizita merkadu lokal iha Port Vila, iha neebe halo interasaun ho vendedor no sidadaun sira, konhese besik liu tan produtu lokal balun, no dinamika komersiu komunidade nian.
Durante vizita, Xefe Estadu hola produtu lokal balun, inklui produtu agríkula fresku, iha inisitiva ba valorizasaun produtu lokal no hakbesik ba komunidade sira iha nasaun refere.
Tuir mai, produtu sira neebe sosa ona entrega ba hospital sira iha Vanuatu, hanesan jestu amizade, solidariedade no kooperasaun entre povu Timor Leste no povu Vanuatu. Inisiativa ida nee hakarak fo kontribuisaun simboliku ba bem estar pasiente no profisional saude sira, no hametin liu tan relasaun respeitu no boa vontade entre nasaun rua nee.
Atividade ida nee tama iha programa Vizita Estadu no reflete kompromisu Prezidente Ramos Horta atu promove relasaun amizade no kooperasaun ho Republika Vanuatu, no mos valoriza kontaktu direta ho komunidade lokal sira.
Vizita nee realiza iha vespera komemorasaun aniversariu ba dala 46 Independensia Vanuatu, no reafirma fila-fali lasu istoriku amizade no kooperasaun entre Timor Leste no Vanuatu.
Aleinde nee iha kinta dader, (30/07/2026) Prezidente Republika Jose Ramos Horta partisipa iha serimonia ofisial foti Bandeira Nasional Republika Vanuatu nian iha Parke Independensia (Independence Park) iha Port Vila hodi marka Loron Aniversariu Independensia ba 46 Republika Vanuatu nian.
Prezidente hamutuk ho lider distintu sira seluk husi rejiaun nee, inklui Primeiru Ministru Papua Gine Foun, James Marape, hodi asiste ba momentu istoriku nee no hatudu solidariedade ba povu Vanuatu nian.
Prezidente nia partisipasaun iha serimonia nee kompleta ajenda ofisial husi nia Vizita Estadu istorika, neebe hahu iha loron 28 fulan Julhu. Durante vizita nee, Prezidente Ramos Horta halao sorumutu nivel aas ho lideransa Vanuatu nian inklui Prezidente Nikenike Vurobaravu no Primeiru Ministru Jotham Napat no asiste mos ba asinatura instrumentu bilateral xave sira, liuliu Akordu Jeral Kooperasaun no Akordu Izensaun Vistuu ba titular pasaporte diplomatiku, ofisial, no servisu nian.
Eventu selebrasaun nee reafirma lasu istoriku klean, solidariedade, no luta ba autodeterminasaun neebe fahe hamutuk hodi hametin Timor-Leste no Vanuatu. Sorumutu nee mos fo kbiit ba parseiria neebe boot ba beibeik entre Timor-Leste no Estadu Insular Pasífiku sira seluk, hodi sublina sira-nia kompromisu hamutuk atu dudu pas rejional, reziliensia klimatika, no dezenvolvimentu sustentavel iha mundu rai-klaran.
(eme)
