DILI, STLTIMORLESTE.com — Estrada koak iha area Kolmera lori perigu boot ba seguransa rodoviaria, neebe hamosu preokupasaun ba kondutores no sidadaun sira neebe liu husi area publiku nee loro-loron.
Bazeia ba observasaun iha terrenu, haktuir husi foto neebe rekolha, estrutura asphaltu iha zona refere hetan estragus ho koak boot ida besik pasadeira no lampu sinalizaun trafiku sorin, neebe bele ameasa seguransa trafiku no estraga karreta nia parte kraik.
Situasaun neebe aat no husik hela deit hamosu preokupasaun ba motorista sira, tanba risku akontese asidente bele mosu, liu-liu ba motorista sira neebe la haree didiak iha tempu kalan ka bainhira udan taka bee.
Koak nee dada atensaun husi ema hotu neebe pasajen iha estrada nee nia sorin-sorin, lampu sinalizaun trafiku no edifísiu komersiu sira iha Kolmera nia leet.
Haree husi sorin dalan, karreta no motor sira neebe liu tenke fila hasees an lalais husi koak neebe aat iha klaran, hodi evita estragus ba karreta no garante seguransa viajen nian.
Observasaun vizual iha terrenu hatudu ho klaru katak kondisaun estrada koak nee kleur ona, neebe bele haree husi aspetu asphaltu neebe tun klean no rahun iha sorin-sorin husi koak nee nia laran.
Dalan neebe aat no koak nee presiza tebes atensaun urjente husi entidade responsavel sira hodi hadia lalais, nunee bele garante fali seguransa ba ema hotu neebe uza via publiku nee.
Kondutor Jaime da Silva hateten katak, estrada koak nee lori perigu boot ba motorista sira neebe liu husi area Kolmera loro-loron, tanba risku estraga karreta nia parte kraik neebe aas tebes se la kuidadu diak.
“Realidade neebe mosu hatudu katak bainhira haree estrada neebe koak, ita sente laran susar no preokupa ho seguransa trafiku iha kapital laran,” dehan Jaime ba STL, Segunda nee (03/08/2026).
Jaime hatutan katak, governu liu husi entidade kompetente tenke tau matan lalais ba problema nee molok atu akontese dezastre ka estragus neebe boot liu, ba kondutores no motorista sira neebe uza dalan publiku nee loron-kalan.
Komunidade Manuel da Conceição, neebe hela iha area neeba mos haktuir katak, sira sente preokupa ho kondisaun estrada koak nee, tanba barak mak tenke haree kedas susar neebe motorista sira enfrenta bainhira liu husi fatin nee loro-loron.
(car)
