DILI, STLTIMORLESTE.com – Relasiona ho eventu Dili Maratona Internasional (DIM) neebe mak sei realiza iha loron 6 Agostu 2026. Ministeriu Saude (MS) liu husi Servisu Nasional ba Ambulansia no Emerjensia Medika Institutu Publiku (SNAEM,I.P) sei monta medical camps kits ka tenda sokorru 9.
Liu husi komunikadu neebe STL asesu husi media SNAEM, Segunda (03/08/2026) hatete, SNAEM,I.P sei monta medical camps kits ka tenda sokorru hamutuk 9 neebe mak ekipa observa ona tuir dalan maratona nian. Tenda sokorru nee sei monta iha area sira hanesan iha Palasiu Prezidensial nia oin, iha tasi ibun besik Embaixada Japaun, iha Igreja Motael nia oin, iha Palasiu Governu nian oin, iha Bidau Santa Ana, iha area Metiaut, iha area Metiaut JL World nia oin, iha area Cristu Rei, nomos iha area Dolok Oan.
Ministeriu Saude liu husi Diretor Jeral Servisu Nasional ba Ambulansia no Emerjensia Medika, Simplicio Amaral de Deus halo vizita no observa direta ba fatin monta tenda fatin neebe mensiona akompana husi Departementu Servisu Emerjensia Medika Dili, Martinho da Conceição Alves Correia, Xefe Departementu Emerjensia Medika, Mariano Rodrigues Sarmento ho ekipa ambulansia sira.
Iha sorin seluk, Infermeira Maria Rebelo hatete, tenda sokorro nee importante tebes para hodi halo atendementu saude ba atleta no partisipante sira neebe hola parte iha eventu Dili Maratona Internasional nee, hodi asegura nafatin saude ba sira bainhira hasoru problema kona saude nian.
Nia dehan, eventu importante sira hanesan nee sempre iha involvimentu husi parte Ministeriu Saude nian, tanba sidadaun ruma bainhira monu, oin halai, oin nakukun no seluk tan presiza tebes atendementu husi parte saude nian, tanba neemak tenke monta duni tenda sokorro nee iha dalan prisipal sira neebe marka ona ba eventu ida nee.
Nunee mos sidadaun Julio dos Santos katak, tenda sokoro nee importante tebes ba sidadaun sira iha eventu ida nee, liu-liu ba atleta sira neebe hola parte iha Dili Maratona nee. Bainhira sira monu ka oin halai, sira bele hetan lalais atendementu saude husi mediku iha tenda sokorro neebe husi parte MS monta iha estrada ninin, liu-liu ba dalan hirak neebe atleta sira atu liu ba.
(dom)
