DILI, STLTIMORLESTE.com – Iha dadur nain 32 sofre moral mental, maibe tratamentu ba sira kontinua lao, tanba iha kolaborasaun ho Ministeriu Saude.
“Sira neebe moras mental nee iha 32 pesoas, husi numeru nee maioria la grave, ita bele sura ida nain rua ka nain tolu mak presiza tenke iha atensaun masimu ba sira,” dehan Diretor Nasional Servisu Prizional no Reinsersaun Sosial, Delfio Soares Alves ba STL iha Kaikoli, Segunda (03/07/2026).
Nia hatutan, tratamentu ba dadur sira neebe moras iha loron Sesta regularmente Ministeriu Saude liu husi sira nia OPD pisikatria ba halo hela tratamentu ba dadur neebe moras, envolve mos Sikologa no departamentu Insersaun ba halo tratamentu ba dadur sira neebe sofre moras mental.
Esplika, konaba sira neebe moras baibain la iha perturba ba sira nia seguransa nee, Ministeriu Saude nafatin koloka sira nia mediku ida iha neeba husi loron Segunda too Sesta hodi halo tratamentu.
Afirma tan, iha Prizaun Bekora oras nee daudaun akumula dadur juvenil hamutuk nain 44.
“Juvenil iha prizaun Bekora iha 44 pesoas, sira neebe halo idade liu ona juvenil ami tenke koloka fali ba bloku adultu sira,” dehan nia.
Hatutan, dadur juvenil sira nee provizoriu sei koloka hela sira iha bloku ketak ida, hodi hein ba prosesu atu harii sentru juvenil.
Iha sorin seluk, Jurista Jose Maria Guterres dehan, importante duni tau atensaun ba ida dadur sira neebe sofre moras, tanba kauza husi sira nia moras mak ikus mai sira komete krime.
“Hau hanoin presiza iha tratamentu ketak ba sira, tanba kauza husi sira nia moras mak ikus mai sira komete krime, tanba nee presiza halo tratamentu hodi halo prevensaun iha futuru,” dehan nia.
Akresenta tan, husu Governu mos instala ona Sentru Juvenil, hodi nunee bele akumula dadur sira neebe idade sei juvenil. Tanba sira labele akumula iha fatin ida hamutuk ho dadur indultu sira, maibe tau sira iha fatin ketak ho formasaun sira atu bele muda sira nia aktu neebe sira pratika ona, molok sira reintegra ba iha komunidade.
(ter)
