DILI, STLTIMORLESTE.com – Embaixador foun Malazia iha Timor Leste (TL), Fairuz Adli bin Mohd Rozali aprezenta aan ba Primeiru Ministru, Kay Rala Xanana Gusmão, molok hahu ofisialmente nia misaun diplomatika iha TL.
Embaixada Malazia, Fairuz Adli bin Mohd Rozali prontu atu servisu hamutuk ho Gabinete Primeiru Ministru, Ministeriu no instituisaun relevante sira hodi hametin relasaun bilateral entre nasaun rua.
“Ami prontu atu servisu hamutuk ho Governu TL no hein katak iha futuru bele aumenta tan kooperasaun bilateral entre Malazia ho TL,” hatete Embaixadór Fairuz ba jornalista sira iha Palasiu Governu, Tersa (04/08/2026).
Enkontru dahuluk nee seidauk diskute projetu espesifiku ruma, tanba ninia objetivu prinsipal mak halo introdusaun ofisial.
Diplomata nee mos foin too iha Dili no kompleta semana rua deit dezde hahu nia servisu iha TL.
“TL hanesan nasaun ida neebe bonitu loos, hau sei kontinua aprende no komprende liu tan kona-ba situasaun iha TL no maneira servisu iha nasaun ida nee,” nia espresa.
Embaixador Fairuz Adli bin Mohd Rozali substitui embaixador uluk neebe remata ona nia mandatu.
Malazia ho Timor Leste iha relasaun bilateral neebe kleur ona, fundamenta iha amizade entre povu rua no kooperasaun iha area oi-oin.
(alb)
