DILI, STLTIMORLESTE.com – Prezidente Republika (PR), Jose Ramos Horta hatete, atividade Maratona Internasional Díli (MID) 2026 hanesan atividade desportu hodi hametin dame iha rai laran.
Prezidente Republika Jose Ramos Horta ba jornalista sira iha Palasiu Prezidensial Nicolau Lobato, Bairo Pite, Kuarta nee (05/08/2026) hatete, atividade MID 2026 sei hametin dame iha laran no promove Timor Leste iha mundu.
Prezidente Republika hatete, atividade MID 2026 sei hahu iha loron 8 fulan Agostu, iha tuku 5 madrugada, abertura iha Palasiu Prezidensial.
“Dia 8 Agostu hahu tuku 5 dader, hahu Dili Internasional Maratona, tinan ida nee organizadu didiak tanba prepara aan kleur ho apoiu neebe diak husi Governu laos deit finansiamentu nee maibe ministeriu sira hotu hotu neebe relevante ba ida nee kolabora makaas, buat hotu hotu tau matan diak, setor seguransa, saude, liu husi ministeriu saude, seguransa klaru numeru um mak PNTL maibe bekap husi instituisaun F-FDTL para kontrola tranzitu, lojistiku komplikadu tebes tanba tenke haree problema saude, bee, hahan, aleinde nee introdusaun teknolojia neebe standar internasional para haree,” dehan PR Horta.
PR Horta dehan, tinan ida nee partisipasaun boot liu tan husi rai barak no premiu mos diak, no Timor-oan lubuk ida partisipa, no fulan hira nia laran halo daudaun treinamentu iha Gleno Railaku.
“Objetivu mak nee, tanbasa mak halo? ida desportu, desportu nee responsavel iha rai sira iha mundu nee tenke halo desportu oin oin, ida uza desportu para hametin liu tan dame iha sidade laran, iha Timor laran, tanba iha ajenda mundial hanesan atraksi, turista sira mai,” dehan Prezidente Republika Ramos Horta.
Xefe estadu hatete, atividade nee sei dada artista husi indonezia no fatin sei mai anima iha eventu refere.
Aleinde nee joven sira neebe mai partisipa eventu nee koalia ho Prezidente Republika katak, iha Palasiu Prezidensial laiha seguransa armada.
“Sira mai kontente los tanba joven sira nee koalia ho hau sira hakfodak iha Palasiu Prezidensial laiha seguransa armada, ema tama avontade, iha mundu nee uniku Prezidente mak nunee, atu hatudu ba sira seguransa total, sira mos rona, lee hodi hatete Timor nia demokrasia numeru um iha saun prinseza liberdade imprensa diak tebes numeru um iha saun prinseza, sira lee hatete hodi konfirma numeru 3, Singapura numeru um, Malazia numeru dois, numeru tres Timor Leste, seguransa iha saun Prinseza iha ASEAN, buat sira nee mak kontribui ba dalan promove Timor nuudar distidu ida ke pasifiku, dame, seguransa iha, povu diak, labarik lao avontade, tanba nee mak halo atividade Dili Maratona Internasional ho atividade seluk tan iha 21, 22 premio nobel ba siensia no 23 hahu reuniaun,” dehan PR Horta.
PR dehan, tanbasa halo atividade nee, tanba laiha buat seluk se ba deit Prezidente halo deit reuniuan boot sira nee, maibe tanba Prezidente hakarak duni oportunidade ba estudante sira, Universitariu, profesores, mediku, rona saida mak nobel sira esplika, no atividade sira nee lao diak, premiadu sira nee sei hakerek iha media hodi promove Timor nia naran iha mundu.
(eme)
