DILI, STLTIMORLESTE.com – Prezidente Republika (PR), Jose Ramos Horta hatete, bainhira mandatu remata sei buka dalan kontinua fo han labarik sira neebe durante nee Prezidente Republika fo han liu husi dapur ba povu.
Prezidente Republika Jose Ramos Horta ba jornalista sira iha Palasiu Prezidensial Nicolau Lobato, Bairo Pite, Kuarta (05/08/2026) hatete, bainhira mandatu remata se mak assume kargu nuudar Prezidente Republika nafatin hakoak povu no sai aman ba povu hotu-hotu neebe presiza tulun.
“Hau sei la kandidatu aan karik, se kandidatu lakon la manan nee la buat ida, normal, maibe hau sei husu ba Prezidente foun, ita hotu hatene buat ida fo hahan no atividade Maratona nee laos mandatu konkretu Prezidente nia, maibe Prezidente tenke sai hanesan aman, aman sarani ba inisiativa sira nee, tenke buka servisu didiak ho Governu ho setor privadu sira para atividade sira nee kontinua,” dehan Prezidente Republika.
Prezidente Republika hatete, bainhira mandatu remata sei buka dalan kontinua apoiu labarik sira liu husi fundasaun ida hodi kontinua tulun labarik sira nomos estudante sira neebe presiza tulun.
“Hau nuudar eis Prezidente Republika karik, hau sei kontinua apoiu, hau iha fundasaun ida ke agora daudaun servisu manas hela fo bolsa lubuk ida iha rai laran no rai liur, hau ses aan husi Prezidente, fundasaun nia atividade sei barak liu tan para tane nafatin joven no labarik sira nee,” katak PR Horta.
Xefe Estadu hatete, konaba fundasaun seidauk halo propaganda barak maibe ho naran Fundasaun mak “Fundasaun Futuru Labarik sira nia”, nee la signifika fo tulun deit ba kosok oan sira maibe ema balun neebe presiza duni apoiu humanitariu ba hospital ruma fundasaun sei apoia, sosa ekipamentu, no balun husu apoiu ba sira nia teze remata Teoria ho osan karun tebes se husu bele fo apoiu.
Prezidente Republika hatete, nia laiha ona vontade atu kandidata aan fali ba Prezidente Republika iha 2027. “Vontade laiha liu atu kandidata aan,” katak PR Horta.
Prezidente Republika haktuir tan katak, povu interven bainhira ba tuir vota maibe Prezidente la kandidata aan tanba laiha vontade.
Nunee mos Jestor Dapur Prezidente Republika, Bela Galhos hatete, kada loron dapur Prezidente Republika fo han labarik nomos inan sira neebe fo susu no isin rua 300 pesoas no dala ruma too 400.
“Fo han deit iha dapur kantina matak Palasiu Prezidensia nee besik 300 ou 400, depende ba Prezidente nia eventu, kuandu Prezidente iha eventu balun numeru nee bele sae too numeru 700 iha dapur 5 tomak loron loron, no iha fulan tomak ita tein 16 mill too 17 mill pesoas neebe mak asesu ai-haan ba dapur Prezidente nia iha fatin 5, ida iha Oecusse, Hera, Palasiu Prezidensial Kantina Matak, no rua nee deliver tanba iha parte ida lori hahan ba inan isin rua ho oan barak neebe labele lao hela iha sira nia fatin, ida fali mak iha Eskola Labeh ba kiik oan sira, tanba diretor eskola mak koalia rasik ho Prezidente, tanba nee mak loron loron lori hahan ba fatin rua nee,” dehan Jestor Kantina Matak.
Jestora Dapur Prezidente Republika hatete, hahan sira nee menu mai husi Prezidente Republika Jose Ramos Horta katak tein tenke ho modo fresku no tenke iha Sop, naan, manu tolun no hahan tenke fresku no hahan lokal, no hahan sira sosa husi merkadu lokal husi povu iha merkadu Taibesi.
(eme)
