DILI, STLTIMORLESTE.com – Prezidente Republika (PR), Jose Ramos Horta rekomenda, se mak aban bainrua asumi kargu nuudar Prezidente Republika iha 2027 tenke servisu hamutuk ho IX Governu Konstitusional.
Prezidente Republika Jose Ramos Horta ba jornalista sira iha Palasiu Prezidensial Nicolau Lobato, Bairo Pite, Kuarta (05/08/2026) hatete, daudaun nee Timor Leste tama ona ASEAN, tanba nee se mak povu fo fiar asumi kargu nuudar Prezidente Republika tenke servisu hamutuk ho Governu neebe lidera husi Primeiru Ministru Kay Rala Xanana Gusmão.
“Hau hatete deit mak ida nee, se mak ba Prezidente Republika tenke kuidadu didiak, tenke haraik aan, servisu didiak ho Governu ho Maun boot Xanana tanba nia sei Primeiru Ministru nafatin iha 2027-2028, no eleisaun foun mai 2028 ita la hatene se mak manan, podiser ke maun Xanana mak kontinua para labele akontese hanesan iha tinan kotuk tempu Taur Matan Ruak nuudar Prezidente la kleur konflitu ho Governu, depois mai Prezidente Lu Olo neebe hau hadomi nia eransa nia legado relasaun aat los,” dehan PR Horta.
Prezidente Republika hatete, daudaun nee Timor Leste tama ona membru ASEAN husu atu labele akontese tan hanesam tempu neebe liu ona Governu lao arbiru los, ida nee sai lisaun ba oin labele akontese tan, nunee Governu estadu bele haree ba asuntu importante seluk liga ho estadu.
“Agora tama ASEAN labele buat sira nee akontese, tantu se mak mehi hakarak serbi nasaun nuudar Prezidente tenke hanoin mak ida nee, tenke halo esforsu hotu-hotu para parseria diak ho Governu, enkuantu ita iha sistema ida semi prezidensial poder nee fahe, Prezidente Republika, Primeiru Ministru, Parlamentu ho judisiariu, tanba ita haree ona esperiensia ba kotuk krize 2016, 2017, 2018, eleisaun antisipada, depois mai VIII Governu runguranga, Governu aitonka mai nee labele akontese iha tempu foun mai nee,” katak PR Horta.
Karik Primeiru Ministru Kay Rala Xanana Gusmão kontinua apoiu Prezidente Republika atu kandidata aan fali, oinsa ho PR nia hanoin? Hatan ba kestaun nee Prezidente Republika hatete, nia sei sukat lai buat hotu-hotu, tanba iha Timor oan balun diak iha esperiensia bele asumi kargu nuudar Prezidente Republika.
“Hau hanoin hanesan Bendito Freitas, Ministru Negosiu Estranjeiru nia ema diak los, kalma, nia iha esperiensia internasional, leal metin ba Avo Nana, bele mos Fidelis Magalhaes matenek boot,” hakotu.
(eme)
