DILI, STLTIMORLESTE.com – Prezidente Republika (PR), Jose Ramos Horta hatete, nia garante 100% kadoras Greater Sunrise sei mai iha Timor Leste (TL).
Prezidente Republika, Jose Ramos Horta ba jornalista sira iha Palasiu Prezidensial Nicolau Lobato, Bairo Pite, Kuarta (05/08/2026) hatete, nia garante 100% ho Primeiru Ministru Kay Rala Xanana Gusmão nia esforsu kadoras Greater Sunrise sei mai Timor Leste.
“Kadoras nee mai duni, nee garantidu 100%, hatene ona buat neebe demora deit mak tratadu akordu tolu konaba finansas, impostu, buat sira nee demora tanba Governu, buat sira nee tenke harmoniza hotu, nee kadoras garantidu ona, Governu loke daudaun ona infraestrutura iha Natarbora tanba Greater Sunrise nee laiha problema,” dehan PR Horta.
Prezidente Republika hatutan tan katak, laos Greater Sunrise deit maibe Prezidente mos iha esperiensia katak ho esforsu husi Primeiru Ministru Kay Rala Xanana Gusmão sei rezolve mos Fronteira Maritima ho Indonezia.
“Fronteira Maritima mos hau fiar antes fim de mandatu Maun Boot Xanana nian bele hetan akordu ho Indonezia, no akordu fronteira maritima importante tebes ho Indonezia, tanba impaktu mos ba ita nia fronteira ho Australia, iha ona maibe parte balun seidauk, sei defende ba Fronteira ho Indonezia nia neebe rabat malu, nee mos maun Xanana mak kaer, laiha ema seluk iha Timor nee mak bele kaer ida nee, Maun Xanana mak responsavel numeru um ba susesu fronteira maritima,” dehan PR Horta.
Prezidente Republika hatete, Primeiru Ministru Kay Rala Xanana Gusmão mak responsavel numeru um ba susesu fronteira maritima, Xanana mak responsavel numeru um ba kadoras atu mai, laiha tan ema seluk.
“Sei mai, hau garante mai duni, desizaun halo tiha ona, akordu mak seidauk asina deit tanba hein lei sira nee hotu sira sei asina, ida fali nia mak negosiasaun terestre maritima ho Indonezia, laiha ema seluk bele halo, hau mos labele,” katak PR Horta.
Tanba nee, se mak mai asumi kargu nuudar Prezidente Republika tenke servisu metin ho Primeiru Ministru Kay Rala Xanana Gusmão.
Aleinde nee oinsa Prezidente nia avalisaun ba Bayu Undang neebe daudaun nee la produs ona, karik ida nee sei fo impaktu ba ekonomia Timor Leste ka lae? hatan ba kestaun nee Prezidente Republika hatete, klaru ida nee iha impaktu, maibe sira sei hasai balun bele loke fila fali, Bayu Undang nee bele transforma ba fatin ida.
Maibe iha kampu rua tolu laos Greater Sunrise, Timor resourse iha tinan rua tolu nia laran osan tama daudaun ona, maske Greater Sunrise ohin hahu asina akordu karik lori tinan 6 ka 7 para produsaun maibe osan tama daudaun ona tanba sei gasta US$ 100 milhões ba infraestrutura, kompanhia sira sei gasta osan.
Laos tinan 7 nia laran deit mak osan tama lae? Maibe tama kedas 2027, 2028 osan Greater Sunrise tama liu husi infraestrutura lubuk ida, sidade foun tenke halo iha natarbora neeba, ba trabalhador sira ekonomia book aan daudaun ona.
“Fundu minarai ita aplika iha investimentu matenek iha liur tinan-tinan investimentu fundu minarai nee hatama US$ 1 biliaun lukru mai ita, portantu ita bele gasta fundu petrolifeiru nee menus tuir reseitas tama US$ 1 biliaun, maibe bele halo pedidu imprestimu nee laiha difikuldade tanba relasaun metin los ho United Arabe Emirates, se ohin Primeiru Ministru hatete Prezidente ita ba UAE halo pedidu imprestimu boot ida ba futuru rai ida nee nia, hau hakat ba kedas konsege imprestimu osan boot maibe ho funan kmaan para ita labele book fundu petrolifeiru sobrenu, ita ba husu imprestimu funan kmaan bele selu avontade,” katak PR Horta.
(eme)
