DILI, STLTIMORLESTE.com — Deputadu husi Bankada FRETILIN, Antoninho Doutel Sarmento hatoo rekonhesimentu no louva ba antigu kombatente no veteranu sira, inklui mos kompanheiru Agio Pereira, neebe nia fiar katak sei manten hanoin no espiritu heroiku hodi salva Republika Demokratika Timor-Leste (RDTL) husi grupu mafiozu no fase osan foer sira iha rai laran.
Komentariu nee hatoo husi reprezentante povu nee ba STL liu husi WhatsApp, Kinta nee (06/08/2026), nuudar apelu ida ba defende prinsipiu no valores luta nian, hodi proteje soberania no dezenvolvimentu estadu nian husi interese no rede mafiozu sira iha nasaun ida nee.
Tuir Antoninho, espiritu rezistenzia neebe uluk hatudu husi figura sira iha tempu ukun rasik aan sei moris hela, hodi kontra grupu interesus partikulares ka sira neebe nia klasifika nuudar mafiozu iha governasaun laran.
“Kompanheiru Agio Pereira no kombatente sira sei iha pensamentu heroiku atu salva RDTL husi mafiozu sira,” dehan figura politiku nee hodi reforsa katak espiritu patriotiku nuudar xave prinsipal, atu asegura estadu no povu nia interese no la monu ba liman la loos sira.
Deputadu nee hatutan tan katak, espiritu rezistensia “Liberta Patria no Liberta Povu Maubere” nee mak tenke sai nuudar baze importante hodi asegura katak prosesu governasaun no dezenvolvimentu nian la bele monu ba injetasaun interese privadu nian, maibe tenke fo prioridade nafatin ba interese povu no estadu nian, nuudar país soberanu neebe oferese husi sakrifísiu Martires no Herois da Patria Maubere nian.
Iha sorin seluk, observador polítiku, Manuel da Silva avalia katak, deklarasaun hanesan nee refleta dinamika neebe kontinua eziste iha polítika nasional, hodi hatudu oinsa figura sira husi rezistenzia kontinua uza lian patriotika nuudar mekanizmu kontrolu ba governasaun no jestaun estadu nian.
“Ita presiza haree katak deklarasaun sira hanesan nee fo impaktu, oinsa publiku komprende dezafius politiku neebe mosu daudaun iha jestaun estadu nian,” tenik Manuel da Silva.
Nunee mos akademista husi Universidade da Paz (UNPAZ), Samuel Soares hateten katak, uza dezafius politiku no liafuan patriotiku kona-ba salvaguarda estadu husi grupu interesus hatudu katak, matadalan etika no moral iha poder nafatin sai kestaun sentral iha debate publiku nasional.
(car)
