DILI, STLTIMORLESTE.com – Prezidente Republika (PR), Jose Ramos Horta la fo komentariu konaba suspensaun ba Juiz nain 4, nee kompetensia Konselhu Superior Majistratura Judisiariu (KSMJ).
Prezidente Republika Jose Ramos Horta hatoo kestaun nee ba jornalista sira iha Palasiu Prezidensial Nicolau Lobato, Bairo Pite, Kinta (06/08/2026) hatete, suspensaun preventiva ba Juiz nain 4 neebe halo husi Konselhu Superior Majistratura Judisiariu (KSMJ), nee kompetensia KSMJ, Prezidente konsidera katak desizaun atu suspende Juiz sira neebe iha naran boot no esperiensia presiza halo avaliasaun hodi haree no sukat didiak.
“Konaba Konselhu Superior Majistratura Judisiariu halo suspensaun preventiva ba Juis nain 4 nee hau la komenta. Ida nee inisiativa KSMJ, hau la komenta ida nee,” hatete PR Horta.
Prezidente Republika hatete, halo dialogu ho Juiz sira hotu, Prezidente la iha problema. “Hau konkorda buat balun nee mos normal, Juiz no tribunal laos Maromak. La signifika hau iha poder tribunal atu muda tribunal nia desizaun. Hau la iha poder, maibe hau haree buat ida sala boot, hau komenta kritika. Ida nee normal, maibe hau labele halo tan buat ida,” katak nia.
Konaba desizaun suspensaun Juis nain 4 nee mak responsabilidade KSMJ, no laos Prezidente Republika.
Prezidente mos iha esperansa katak, atu halo desizaun nunee suspende fali Juiz sira konhesidu, naran boot no esperiensia, sira presiza haree didiak. Dala ruma tenke halo duni suspensaun ka bolu deit sira, ka halo deit hanesan avizu ida, duke suspende fali derepente. Prezidente nia hanoin sira mak tenke sukat, maibe PR Horta klarifika katak suspensaun nee laos bazeia deit ba keixa anonima, tanba iha dokumentasaun neebe sustenta argumentu sira.
“Maibe, suspensaun nee laos keixa anonima deit, maibe iha dokumentasaun sustenta sira nia argumentu. Hau la hatete loos, maibe laos bazeia ba keixa anonima deit,” nia hatete.
Xefe Estadu hatutan tan katak, maske Juiz nain 4 hetan suspensaun, maibe la iha impaktu ba prosesu Tribunal Supremu. Tribunal Supremu nia prosesu lao daudaun too fulan Outubru no Novembru bele anunsia kriasaun Tribunal Supremu.
PR Horta dehan, suspensaun nee laos impedimentu ba kredibilidade, esperiensia no kriteriu Juiz sira neebe bele kontinua iha Tribunal Rekursu ka ba kontinua prosesu atu balun sae ba Tribunal Supremu.
Aleinde nee Juiz nain 4 hanesan Deolindo dos Santos, Duarte Tilman, Jacinta Correia no Juisa Maria Natercia neebe KSMJ foti desizaun suspensaun nee iha loron Kuarta (15/07), ho deit keixa anonima neebe aprezenta ba KSMJ.
(eme)
