DILI, STLTIMORLESTE.com – Planu Autoridade Munisípiu Dili (AMD) nian atu lori sistema foun hodi organiza vendedor ambulante, inklui preparasaun fatin espesial no aplikasaun taxa fulan-fulan ba sira neebe faan sasan iha espasu publiku no negosiu kiik hamosu pergunta boot, AMD hakarak duni hamoos sidade ka hanehan liu tan povu kiik nia moris loro-loron.
Komentariu nee hatoo husi Observador Ekonomia, Pedro da Silva nuudar resposta ba anunsiu AMD nian kona-ba regulamentu foun ba komersiu ambulante iha Dili laran. Maski AMD dehan katak mudansa nee atu kria orden, limpeza no seguransa ba sidade, maibe tuir perspetiva moris baze nian, planu nee ladun haree ba realidade moris loro-loron nian husi sidadaun sira neebe depende deit ba rendimentu ki’ik husi dalan ninin.
“Iha situasaun moris baze nian neebe sidadaun sira luta hela ba lor-loron nia han fatin, obrigadu vendedor ambulante sira atu selu taxa fulan-fulan mak hanesan dalan ida atu hakotu sira-nia moris negosiu nian, laos atu ajuda,” deklara Pedro da Silva ba STL, iha Akait, Dili, Sesta nee (07/98/2026).
Nia dehan, Vendedor ambulante barak faan sasan ho kapital kiik no rendimentu la seguru. Husu sira atu selu taxa fulan-fulan hanesan impostu todan ida neebe bele halakon lukru kiik ba sobrevivensia familia nian.
Observador nee mos preokupa katak fatin foun neebe AMD prepara bele dook husi sentru sirkulasaun publiku, neebe ikus mai sei estraga sira-nia negosiu tanba laiha kliente ka komprador.
Ho nunee nia husu ba Autoridade Munisípiu Dili, atu avalia fali planu ne’e ho kuidadu. Nia sujere katak Governu Munisipiu tenke foku uluk ba kria solusaun neee sustentavel no proteje interese povu kiik, laos foku deit ba asuntu kolleta reseita neebe lori deit todan ba sidadaun sira.
Iha parte ketak Akademista Universidade da Paz (UNPAZ), Manuel de Araujo, apoia preokupasaun nee hodi haktuir katak estadu no autoridade munisipiu tenke iha sensibilidade politika hodi haree setor informal nuudar motor ba sobrevivénsia ekonomia domestika, tanba nee desizaun kualker labele halakon direitu moris povu nian iha kapital.
“Kuandu harii desizaun ruma, kualker autoridade tenke hatene katak moris povu kiik nian mak prioridade aas liu, laos foku deit ba taxa fulan-fulan neebe hanehan sira-nia kapital kiik baze,” tenik Manuel de Araujo.
Entretantu antes nee Prezidente Autoridade Munisipiu Dili, Francisco dos Santos, hatete Autoridade Munisípiu Dili (AMD) sei implementa sistema foun atu organiza vendedor ambulante sira iha kapital, inklui preparasaun fatin espesia no aplikasaun taxa fulan-fulan ba sira neebe halao atividade komersiu iha espasu publiku.
Nia dehan, medida nee laos ho intensaun atu halo intervensaun deit ba vendedor ambulante sira, maibe bazeia ba Dekretu-Lei Nú. 3/2024 neebe fo kompetensia ba Autoridade Munisípiu atu jere hijiene, ordem publika no utilizasaun espasu publiku.
(car)
