DILI, STLTIMORLESTE.com – Polisia Nasional Timor Leste detein hikas adolesente mane nain 1 ho inisial AC, tanba deskonfia naok motor iha Bebora foin lalais nee.
Suspeitu AC molok nee hetan detensaun iha sela durante loron tolu, tanba kazu furtu motorizada iha resintu Hospital Nasional Guido Valadares (HNGV) Bidau, maibe hafoin livre kontinua halo fila fali asaun kriminal hodi sobu uma foti motorizada ida iha area Bebora.
PNTL simu informasaun kona-ba akontesimentu nee halo kedas koordenasaun ho Servisu Informasaun Polisia Nasional (SIPN) Arana, Makikit junta Forsa Polisia (FP) no Kakuk husi SNIE, hahu buka suspeitu nee no ikus mai konsege asegura iha Maubara.
“Ho servisu makaas Eskuadra Maubara, koordinasaun ho komunidade no esforsu husi ekipa sira iha terrenu, polísia kontinua halo operasaun buka too konsege hetan no kaptura fali suspeitu subar hela iha komunidade nia uma,” haktuir nota komunikadu imprensa neebe STL asesu husi Servisu Relasaun Publika, Ministeriu Interior, Sabadu (08/08/2026).
Hafoin buka tuir informasaun sira neebe hetan, ekipa servisu konsege hetan fali motor ho kondisaun sobu rahun ona maibe sasan seluk neebe hanesan telefone, masador no gurinda faan ona ba ema seluk.
PNTL kontinua kompromete aan atu servisu makaas hodi garante seguransa komunidade no halao lei ho responsabilidade no apelu nafatin ba komunidade atu kontinua koopera ho autoridade sira, liu husi fo informasaun importante kona-ba asaun kriminal, atu ajuda garante seguransa no ordem publika iha territóriu Timor Leste.
Oras nee daudaun Xefe Ekipa servisu entrega ona Suspeitu AC, hamutuk ho evidensia motor (1) ba Eskuadra PNTL Dom-Aleixo Comoro, hodi halo prosesu investigasaun no detein durante 72h tuir lei neebe iha, antes submete ba tribunal hodi tuir prosesu julgamentu.
(alb)
