DILI, STLTIMORLESTE.com – Iha tempu badak sei fo sai rekrutamentu ba Profisional Saude neebe daudaun nee lista rekrutamentu sei iha hela meza Ministra Saude nian, no hein lori ba iha Funsaun Publiku hodi haree.
Tuir Ministra Saude, Elia dos Reis Amaral hatete, iha rekrutamentu nee presiza tan 300 resin too 400, neebe tempu badak sei fo sai ona.
“Daudaun nee sei iha hela hau nia meza, seidauk manda ba iha funsaun publiku, maibe orsida ka Segunda nee bele manda ona ba FP atu nunee bele haree ba iha rekrutamentu nee rasik,” dehan nia ba jornalista iha Novo Turizmu, Sesta (07/08/2026).
Elia hatete, rekrutamentu nee halo ba iha Hospital Nasional Guidu Valadares (HNGV) nian, alende neemos prepara ba munisipiu sira. Tanba se hasae atendementu ba iha fasilidade saude ba munisipiu signifika presiza mos rekursu umanu.
“Neste momentu politika neebe iha, ita iha deit 300 Profisional saude, neebe presiza atu kompleta iha kada fasilidade saude presiza pesoal saude nain 5 iha neeba kompostu husi mediku, parteira, infermeira, farmasista ho tekniku aliadu ou analistis sira iha neeba, hodi nunee bele kompleta ba iha atendementu iha fasilidade saude sira,” haktuir Ministra nee.
Governante nee hatutan, agora identifika ona fasilidade saude neebe atu hasae numeru pesoal saude, mak foin haree numeru hira mak presiza iha neeba. Tanba sira laos deit hakmatek iha fasilidade saude maibe sira mos sei halo programa ida neebe halao ona iha pakote integridade saude, hodi lao too ba iha suku no aldeia sira. Atu nunee bele tau matan ba komunidade sira neebe mak moras TB. Ida neemak objetivu husi konetividade pesoal saude sira neebe lao iha aldeia no suku.
(dom)
