DILI, STLTIMORLESTE.com – Banco Central de Timor Leste (BCTL) lansa relatoriu trimestral Fundu Minarai Timor Leste ba trimestre daruak 2026 neebe termina iha loron 30 Junhu tinan nee. Relatóriu nee hatudu katak kapitál/balansu iha trimestre nee mak biliaun US$ 18,43, kompara ho biliaun US$,18,31 iha trimestre dahuluk nian.
Tuir Komunikadu Imprensa neebe STL asesu husi media BCTL, Segunda (10/08/2026) hatete, lei fundu minarai estipula katak Ministériu Finansas mak estabelese estratéjia investimentu no BCTL mak halo jestaun operasional ba investimentu.
Nunee, BCTL lansa relatoriu trimestral fundu mina-rai TL nian ba trimestre daruak 2026 neebe termina iha loron 30 fulan Junhu. Relatoriu nee hatudu katak kapitál/balansu fundu mina-rai nian iha trimestre nee mak billiaun US$ 18,43, kompara ho biliaun US$18,31 iha trimestre dahuluk 2026 nian.
Relatoriu nee hatudu katak total reseitas neebe simu iha trimestre nee hamutuk tokon US$ 9,62 no rendimentu brutu husi investimentu hamutuk tokon US$ 719,09, neebe kompostu husi tokon US$ 141,48 husi juros/kupon no dividendu simu, no tokon US$ 577,61 husi mudansa iha valor merkadu. Ho nunee, retornu fundu mina-rai durante trimestre ida nee husi merkadu finanseiru mak 4,05%, kompara ho ninia referensia 3,99%.
Iha trimestre ida nee, total osan neebe dada/sai husi fundu mina-rai hamutuk tokon US$ 603,80, neebe tokon US$ 600 transfere ba konta tezouru atu finansia orsamentu Eetadu no tokon US$ 3,80 hodi selu kustu jestaun investimentu.
Ho nunee, dezde estabelesimentu fundu mina rai, total reseitas aproximadamente billiaun US$ 25,30, total retornu husi investimentu iha merkadu finanseiru hamutuk billiaun US$ 12,65 ho media retornu anual 4,72%, no total levantamentu hodi finansia Orsamentu Estadu hamutuk biliaun US$ 19,66..
(dom)
