DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ba prosesu primeiru interogatoriu, deside aplika medida Prizaun Preventiva ba arguidu nain sanulu resin lima (15) ligadu ho atividade Scamming Call Centre.
Arguidu nain 15 nee detein iha area Bekaril, Suku Metiaut, Postu Administrativu Kristu Rei, Munisipiu Dili.
Prokurador João Marques promove arguidu nain 15 mai iha Tribunal ho krime Jogu Ilisitu previstu iha artigu 322 husi kodigu penal, Krime Asosiasaun Kriminoza previstu iha artigu 188 husi Kodigu Penal, Krime Brankamentus Kapitais previstu iha artigu 313 husi Kodigu Penal, no krime Burla Informatika previstu iha artigu 268 husi Kodigu Penal Timor Leste nian.
Iha despaisu Tribunal nian, liu husi Juiza turnu Ana Paula Fonseca deside aplika medida Prizaun Preventiva ba arguidu nain 15, hodi asegura sira ba iha prosesu investigasaun neebe sei lao hela.
Tuir defeza arguidu sira nian, Advogadu Privadu Marinho da Cruz katak, Tribunal aplika medida Prizaun Preventiva ba iha arguidu nain 15.
“Sira nain 15 tama hotu Prizaun Preventiva, orsida simu notifikasaun iha loron Kinta nee ami hatama rekursu, ami halo rekursu tanba la aseita ho despaisu Tribunal nian,” dehan Marinho ba STL iha Dili, Segunda (10/08/2026).
Nia hatutan, iha alegasaun Ministeriu Publiku neebe reprezenta husi Prokurador João Marques, husu Tribunal atu aplika medida Prizaun Preventiva ba iha arguidu nain 15. Husi defeza husu Tribunal atu aplika medida neebe antes nee iha ona hanesan medida Termo Indentidade Rezidensia (TIR) no medida Kausaun.
Esplika tan, sidadaun sira nee iha Filipina nain rua, no nain sanulu resin tolu husi husi Xina. No iha feto nain tolu husi Filipina nain rua no husi Xina nain ida.
Nunee Tribunal aplika medida refere tanba konsidera arguidu sira mai iha Timor hela iha fatin ida deit, no pasaporte neebe arguidu sira utiliza deskonfia nia viza mate ona. Ho ida nee Tribunal hanoin la iha ona dalan hodi asegura arguidu sira, tanba nee mak Juiz deside tau sira iha Prizaun Preventiva atu bele hafasil liu prosesu investigasaun.
Prosesu primeiru interogatoriu nee prezide husi Juiz Turnu Ana Paula Fonseca, Ministeriu Publiku reprezenta husi Prokurador João Marques, arguidu nain 15 hetan asistensia legal husi Advogadu Privadu Marinho da Cruz, Januario Martins no Advogada Privada Elisabeth Maria Maia.
Rekorda katak, iha loron 07 fulan Agostu tinan 2026, Ekipa Konjunta Autoridade Timor Leste husi Diresaun Servisu Investigasaun Kriminal (DSIK), Diresaun Servisu Informasaun Polísia (DSIP) iha Polísia Nasionál Timor Leste (PNTL), hamutuk ho Servisu Informasaun N2 Komponente Naval iha FALINTIL–Forsa Defeza Timor Leste (F-FDTL) no Servisu Migrasaun konsege sobu tan atividade rede Scam Call Centre no detein sidadaun estranjeiru hamutuk nain 15 durante operasaun neebe halao iha area Metiaut, Postu Administrativu Cristo Rei, Munisipiu Díli.
(ter)
