MANATUTO, STLTIMORLESTE.com —Komandante Polisia Nasional Timor Leste (PNTL) Munisípiu Manatuto, Superintendente Xefe Polísia Joni Viana das Regras hatete, PNTL Manatuto enfrenta limitasaun iha rekursu umanu, ekipamentu transporte no infraestrutura, tanba efetivu neebe disponivel ba ezekusaun servisu polísia la too 100 pesoal.
“Ami agora ho efetivu la sala 110 pesoál, maibe efetivu ba ezekusaun mandamentu papel polísia nian, ita bele dehan la too 100 ida, tanba balun idade avansada, balun moras. Maibe la hamate espíritu vontade hodi servisu nafatin ba povu, espesialmente Manatuto iha jerál Timor Leste,” hatete Komandante PNTL Munisípiu Manatuto, Superintendente Xefe Polísia Joni Viana das Regras ba STL iha Munisipiu Manatuto, Sabadu (07/08/2026).
Nia esplika, maski efetivu menus, situasaun nee la hamate espíritu no vontade membru PNTL sira nian atu kontinua servisu ba povu.
Komandante PNTL Manatuto mak informa katak, ekipamentu transporte, infraestrutura no rekursu umanu sai dezafiu neebe Komando PNTL Manatuto enfrenta.
“Dezafiu neebe Komando PNTL Manatuto enfrenta, liu-liu ekipamentu transporte, infraestrutura no rekursu umanu. Ida nee ami relata ona ba Komando Jerál PNTL, inklui infraestrutura ba ami nia eskudra no kazernas ba membru sira neebe karik muda mai. Nee ami hatoo ona ba Komando Jerál PNTL atu haree,” nia deklara.
Konaba falta efetivu, nia hein katak iha tempu badak tuir anunsiu husi Komandante Jerál PNTL sei iha rekrutamentu ba polísia foun sira.
“Hau hanesan Komandante PNTL Munisípiu Manatuto, hau apela ba joven sira atu prepara aan fizikamente no mentalmente, para bele kompete bainhira vaga rekrutamentu nee loke iha tempu besik,” nia koalia.
Nia hatutan, agora Munisípiu Manatuto iha ona suku 31, no foin lalais Governu dekreta tan Suku Rebor. Tanba nee, presiza mos konsidera operasaun no servisu polísia iha area sira nee.
Iha fatin ketak , Akademista UNTL, Julio da Costa informa, Institutusaun PNTL Manatuto enfrenta limitasaun iha rekursu umanu, ekipamentu transporte no infraestrutura, tanba efetivu neebe disponivel ba ezekusaun servisu polísia la too nee los, tanba nee Governu tenke tau osan boot ba Instituisaun PNTL, tanba PNTL ho F-FDTL mak lutu ba nasaun ida nee.
“Ita haree laos Komando PNTL Munisipiu Manatuto deit mak menus rekurusu humanus, ekipamentus no transporte, maibe Komando Munisipiu PNTL iha kada Munisipiu hanesan, tanba nee Governu tenke tau Prioridade ba PNTL ho F-FDTL nian probelma neebe sira hasoru,tanba ita hakarak segurasa neebe seguru ba ita nia rain ida nee presiza apoiu,” nia afirma.
(jen)
