DILI, STLTIMORLESTE.com – Komisariu Komisaun Anti Korupsaun (KAK), Rui Pereira relata progresu servisu nomos dezafiu sira ba Prezidente Republika, Jose Ramos Horta.
Bainhira remata hasoru malu, Komisariu Komisaun Anti Korupsaun (KAK), Rui Pereira ba jornalista sira iha Palasiu Prezidensial Nicolau Lobato, Bairo Pite, Segunda (10/08/2026) hatete, ohin mai halo enkontru ho Prezidente Republika Jose Ramos Horta hodi relata servisu KAK nia ba Xefe Estadu.
“Ohin komisaria ho ekipa kiik ida husi gabinete ho unidade husi kooperasaun nia mai hasoru Prezidente atu informa servisu Komisaun Anti Korupsaun nia, tanba ita nia Prezidente durante nee akompanha, maibe ami nia tempu laiha hasoru Prezidente, tinan kotuk la konsege foin tinan ida nee, tanba nee ohin tuku 3 loraik ami enkontru ho Prezidente informa ba Prezidente konaba servisu KAK nia tantu iha area investigasaun kriminal, area prevensaun nia nomos area kooperasaun nia,” katak Komisariu KAK.
Komisariu hatete, iha hasoru malu nee informa mos konaba dezenvolvimentu infraestrutura KAK nia dezenhu ba edefisiu KAK nia neebe mak lao hela nomos edefisiu neebe mak hetan finansiamentu husi Ministeriu Planeamentu, AND atraveza orsamentu Kafi nia neebe mak lao hela Farol.
Aleinde nee informa mos ba Prezidente Republika konaba servisu balun neebe mak lao ladun diak mos update hotu ba Prezidente, maibe ida nee fila ba Prezidente mak sei fo sai ba media.
“Ami informa deit servisu neebe mak lao diak nomos servisu balun neebe mak lao ladun diak, lao ladun diak iha servisu investigasaun nia, nee hau hanoin maluk media sira imi hatene ona katak ita nia Prezidente talves iha informasaun, maibe ohin komisariu dala ida tan mai relata fila fali ba ita nia Prezidente Republika konaba kazu sira neebe mak avoka husi senhor Prokurador Jeral Republika, informa hela ba Prezidente konaba assuntu sira nee,” dehan Komisariu.
Nia hatete, ohin mai informa ba Prezidente konaba servisu KAK nia, maibe Prokurador Jeral Republika nee Prezidente Republika mak nomea no fo posse, tanba nee ohin Komisariu mai nee informa deit servisu KAK nia.
Espektativa ba oin espera katak entre KAK no Ministeriu Publiku, PSIK, Polisia no instituisaun estadu sira tenke servisu hamutuk atu lori rai nee ba oin no dezenvolve rai nee ba oin laos atu trava malu maibe presiza serbisu hamutuk.
“Ami mai mos ohin lori ho dokumentus pasta ida iha 19 nee servisu KAK nia durante 2010 mai too ohin loron,” katak nia.
Iha biban nee Prezidente Republika, Jose Ramos Horta hatoo benvindu ba Komisariu KAK ho ekipa neebe ohin mai Palasiu Prezidensial hodi relata progresu servisu é nomos fezafiu neebe hasoru durante nee ba Xefe Estadu.
Prezidente nia mensajen neebe baibain espesifiku mak husu instituisaun sira hanesan KAK, Ministeriu Publiku, PSIK, Polisia no instituisaun estadu sira tenke servisu hamutuk atu lori rai nee ba oin no dezenvolve rai nee ba oin ho diak liu tan.
(eme)
