DILI, STLTIMORLESTE.com – Koalia konaba estrutura nasaun, maske partidu ketak ketak maibe lider sira sempre iha konsensus nasional ba nasaun nia diak.
Lia hirak nee Prezidente Republika (PR), Jose Ramos Horta ba jornalista sira iha Palasiu Prezidensial Nicolau Lobato, Bairo Pite, Segunda (10/08/2026) hatete, dezde uluk too mai ohin loron buat neebe sai ezemplu iha Timor Leste mak konaba nasaun nia diak, no estrutura nasaun lider sira sempre iha konsensus nasional, nee ezemplu diak tebes.
“Buat ida ke pozitivu ba ita iha istoria dezde independensia, buat barak ita hetan konsensus do estadu laos buat hotu hotu partidu mak halo ka, partidu ida halo partidu ida seluk mai la halo ou governu foun mai la simu lae, iha ita nia istoria ezemplu iha politika externa iha konsensus nasional lider sira hotu hotu dezde 1975, dezde 2002 too agora iha konsesus, ezemplu adezaun ba ASEAN nee konsensus nasional, CPLP konsensus nasional, ita nia apoiu ba situasaun sira hanesan umanitariu ke estadu ita nia nee fo nee hanesan laiha rai barak hanesan Timor kiak maibe la haluha kuandu ema terus iha neebe buka ajuda,” dehan Prezidente Republika.
Prezidente Republika hatete, konsensus nasional nee laos foin maibe dezde luta iha ai laran iha 1975, no 2002 too ohin loron konsensus nasional nee lao diak tebes, la hanesan rai seluk. Lider sira maske iha partidu neebe diferente maibe koalia konaba nasaun nia diak sira sempre hamutuk.
Prezidente Republika hatete, buat nee importante ba sosiedade, no projetu seluk tan hanesan Aeroportu Tibar nee mai husi Governu anterior tempu PM Xanana nia depois remata ho oitavu Governu, identifikasaun ba nasaun liu husi governu lubuk ida nia kontinuidade.
“Laos buat hotu hotu partidariza, nee mak importante tebes, buat neebe boot importante estruturasaun do estadu nee hahu kedas Primeiru Governu konstitusional, ita haree prioridade neebe Dr Mari Alkatiri iha 2002-2003 hatete nunee, prioridade estruturasaun do estadu nee los duni, hahu kedas iha neeba, ohin estadu forte liu duke antes mais kontinua ho dezafiu, maibe ita bele hatete estadu nee pelumenus hatete viavel, estadu nee laos hanesan barak hatete frazil, ita bele hatete bele simu frazil maibe ita nia ranking mundial diak los,” katak PR Horta.
PR Horta hatete, maske Timor hanesan ema hatete frazil maibe rangkin mundial diak los ema rekonhese iha mundu ida nee mos ezemplu neebe diak.
Xefe Estadu hatete, dezde primeiru Governu neebe lidera husi Eis Primeiru Ministru Mari Alkatiri neebe sempre hatete prioridade ba estrutura estadu sempre hamutuk, ida nee uluk too mai ohin loron lao duni nunee, no halo estadu neebe forte tebes duke antes.
(eme)
