DILI, STLTIMORLESTE.com – Prezidente Republika (PR), Jose Ramos Horta hatete, Fidel Castro belun boot ba Timor Leste (TL) dezde uluk too mai agora.
Prezidente Republika Jose Ramos Horta hatoo lia hirak nee liu husi nia diksursu iha selebrasaun aniversariu Fidel Castro ba dala 100 iha Arkivu no Muzeu Rezistensia Timorense, Díli, Tersa (11/08/2026).
Prezidente Republika hatete, nia asosia aan iha selebrasaun sira sentenariu moris Fidel Castro Ruz nian, figura ida neebe mak marka ho klean istoria sekulu XX nian no neebe nia influensia ultrapasa fronteira sira Kuba nian.
Prezidente Republika hatete, Fidel Catro moris iha tinan atus ida liu ba, iha ema hadomi nia no iha ema odiu nia, no istoria ezije atu rekonhese ninia dimensaun oi-oin, liu-liu saida mak nia husik hela iha povu sira seluk nia moris. No Fidel Castro sai belun boot ba Timor Leste.
“Ba ami, Timor-oan, Fidel Castro sai, liu-liu, Belun Boot Timor Leste nian. Hau hanoin hikas ami nia enkontru iha Kuala Lumpur, iha tinan 2003, hamutuk ho Prezidente Republika iha tempu neeba, Kay Rala Xanana Gusmão. Timor Leste foin restaura ninia independensia. Ami mak nasaun joven ida ho nesesidade sira neebe mak boot tebes, liu-liu iha saude no formasaun ba ami nia rekursu umanu sira,” dehan PR Horta.
PR Horta dehan, Fidel kompriende realidade ida nee no Cuba responde ho asaun konkretu. Mediku no profisional Kubanu atus ba atus mak mai iha Timor Leste. Joven Timor-oan sira ba estuda iha Kuba. Kooperasaun nee kontribui ba formasaun mediku Timor-oan atus ba atus no ba dezenvolvimentu TL nia kapasidade saude nasional.
Maibe kooperasaun Cuba-Timor Leste la limita deit ba medisina. Inklui mos edukasaun no programa alfabetizasaun konesidu “Yo, sí puedo” (Sim, hau bele), neebe ajuda timoroan rihun ba rihun hetan abilidade bazika lee no hakerek.
“Bainhira hau hanoin kona-ba Fidel Castro nia legadu ba Timor Leste, dimensaun umana nee mak hau konsidera importante liu. Kuba la fo deit asistensia mai ami, sira ajuda ami atu forma ema. Mediku Timor-oan ida fila ba uma hodi trata labarik ida, inan ida ka ferik katuas ida halo hela kontribuisaun ida neebe hakat liu kualker momentu polítiku. No durante tinan susar sira, profisional kubanu sira hela nafatin ho ita nia pasiente sira no ita-nia komunidade sira,” katak Horta.
Iha momentu sira nee mak rekonhese solidariedade lo-loos. Tanba solidariedade la sukat deit husi saida mak halo bainhira buat hotu lao diak. Ida nee sukat husi saida mak halo bainhira ema seluk hasoru hela tempu susar sira. Nee mak Cuba halo ba Timor Leste.
Xefe Estadu hatete, solidariedade Kubana ho nasaun sira iha Sul Global mak karakterístika ida neebe markante liu husi legadu internasional Fidel Castro nian. Mediku, profesor no profisional kubanu sira serbisu iha rejiaun oioin iha Afrika, Amerika Latina no Azia, hodi kontribui ba saude, edukasaun no formasaun ba rekursu umanu sira. Timor Leste hetan benefísiu husi solidariedade nee. No tanba nee duni mak Timor Leste la haluha ninia belun sira.
(eme)
