DILI, STLTIMORLESTE.com – Prezidente Republika (PR), Jose Ramos Horta hatete, Timor Leste (TL) nia diplomasia harii iha memoria gratidaun nia leten, durante luta ba auto determinasaun.
“Ita nia diplomasia mos harii iha memoria no gratidaun nia leten. Durante ita nia luta ba auto determinasaun, ita buka belun sira iha mundu tomak. Hafoin ukun aan, ita buka parseiru sira atu harii ita nia Estadu,” dehan Prezidente Republika, Jose Ramos Horta liu husi nia diksursu iha selebrasaun aniversariu Fidel Castro ba dala 100 iha Arkivu no Muzeu Rezistensia Timorense, Dili, Tersa (11/08/2026).
Prezidente Republika hatete, nia fiar katak katak diferensa polítika entre Estadu sira labele hamosu sofrimentu ba populasaun tomak. fiar iha dialogu, iha kooperasaun, iha multilateralizmu no iha respeitu ba Direitu Internasional.
“No ami fiar katak povu kubanu tenke bele partisipa tomak iha ekonomia internasional no iha asesu ba kondisaun sira neebe nesesariu ba sira nia dezenvolvimentu no moris diak,” dehan PR Horta.
Xefe Estadu hatete, iha 2024, nia mos hatoo preokupasaun konaba inkluzaun Kuba nian iha lista Estadu Patrosinador nian ba terorizmu. PR kontinua fiar katak polítika izolamentu no sansaun laos dalan atu rezolve diferensa entre Estadu sira.
Kuba projeta mediku sira, profesor sira no solidariedade umanitaria sira ba mundu tomak. Liu husi dialogu mak diferensa sira tenke rezolve.
“Ohin, kestaun ida nee hetan urjensia partikular. Kuba hasoru hela situasaun ekonomika no enerjetika ida neebe maka susar tebes. Ahi mate beibeik, menus kombustível no difikuldade atu asesu ba sasan esensial sira afeta hela populasaun nia moris loro-loron no fo presaun ba servisu fundamental sira, inklui saude no fornesimentu bee,” katak PR Horta.
Iha sentenariu ida nee, Prezidente hakarak husik mensajen ida neebe hakat liu Fidel Castro no hakat liu TL nia nasaun rua. Atu ninia ezemplu solidariedade internasional fo inspirasaun ba ema hotu neebe, iha parte oioin mundu nian, dedika sira-nia servisu no sira nia moris ba kooperasaun entre povu sira, ba saude, ba edukasaun no ba defeza dignidade umana.
Ema sira nee mak mediku sira, profesor sira, tekniku sira, voluntariu sira, traballador umanitariu sira no seluk tan neebe transforma solidariedade ba asaun konkreta sira no lori povu sira besik malu liutan. Liu husi sira mak amizade entre nasaun sira sai realidade.
(eme)
