DILI, STLTIMORLESTE.com — Foer neebe naknu no hobur iha valeta laran hamosu bee dalan taka metin, neebe fo ameasa boot ba inundasaun iha area sidade nian wainhira udan tun ho intensidade boot.
Observasaun diretu iha terenu hatudu valeta nee nakonu ho lixeira oi-oin hanesan garrafa plastiku, saku plastiku no surat-tahan neebe dodok hamutuk iha bee nalihun laran. Kondisaun nee halo bee labele suli ho diak no hahu fo iis la diak ba meiu ambiente.
Kondisaun nee hatudu katak jestaun soe lixeira husi komunidade sidade nian sei menus no seidauk iha manutensaun rutinaria husi autoridade kompetente sira ba valeta publika sira.
Komunidade ho parte relevante sira presiza foti asaun urjente hodi hamoos no loke fali valeta nee, nunee bele duni sai risku moras no hasees sidade husi ameasa inundasaun.
Iha observasaun terenu mos nota katak valeta balun namkari no la uza sementi hodi taka metin, nunee fasilita foer ho bee aat halibur metin no fo risku ba ema neebe lao trotuar leten bele monu ba laran.
Preokupasaun nee mos hatoo husi negosiante Mariana da Silva neebe faan iha area nee, hodi husu ba autoridade kompetente sira atu foti asaun lalais hodi hamoos valeta nee no kria fali meiu ambiente neebe moos ba dalan publiku.
“Ita presiza duni autoridade sira nia atensaun hodi hamoos lalais valeta nee, tanba kondisaun foer no iis aat nee halo ita hotu la konfortábel no kria risku boot ba ita nia saude loron-loron,” dehan Mariana ba jornalista STL iha Dili, Kuarta nee (12/08/2026).
Mariana hatutan, se kuandu autoridade no komunidade sira la foti asaun lalais, kondisaun valeta ne’e sei aat liu tan wainhira udan boot mósu mai, no bele halo bee nakonu fali too trotoar no taka sira nia fatin faan nian.
Iha fatin hanesan, sidadaun Marcelino de Oliveira neebe liu husi srea nee hatoo mos nia preokupasaun, hodi husu ba parte kompetente sira no komunidade atu iha responsabilidade hamutuk hodi la soe foer ba valeta laran no trotoar leten, tanba valeta nakloke neebe ho foer nakonu nee fo ameasa boot ba seguransa ema lao ain nian.
“Hau lao liu husi fatin nee loron-loron no sente la seguru tanba valeta nee nakloke no nakonu ho foer. Hau husu ba governu no autoridade sira atu foti asaun urjente hodi taka no hamoos fali valeta nee atu la fo perigu ba ami ema lao ain,” dehan nia.
(car)
