DILI, STLTIMORLESTE.com – Komunidade afetadu ba projeitu reabilitasaun estrada urbana Baukau Vila seidauk hetan indemnizasaun, tanba iha faze verifikasaun dadus.
Lia hirak nee hatoo husi Ministru Obras Publikas (MOP), Samuel Marcal ba STL hafoin remata reuniaun Konselhu Ministru iha Palasiu Governu, Kuarta (12/08/2026).
Nia dehan, ba komunidade sira neebe afeitadu ba iha projetu reabilta estrada urbana iha Baukau Vila neebe seidauk hetan indemnizasaun, sei faze prosesu verika dokumentus tanba, nee osan estadu nia iha sistema.
“Osan nee laos ita tau hela iha kaixa laran neebe foti ba deit, maibe iha sistema, tanba nee iha faze verika hela tenke kompleta dokumentus legais sira hotu no haree mos sira nia konta bankaria kompleta hotu ona, hafoin ita halo pagamentu ba sira,” hatete Samuel.
Governante nee haktuir, bainhira atu halo pagamentu hein deit, tanba sei prosesu komesa etapa ida ba etapa.
“Maske komunidade sira ezije maibe osan nee laos tau iha hau nia bolsu para foti fo deit, maibe ita iha sistema,iha lei no regras tenke liu husi prosedimentu nee,” dehan nia.
Nia dehan, komunidade nee eroi ba dezenvolvimentu, sira nia pasiensia no sakrifisiu ba rai nee boot tebes, hatudu katak sira hadomi rai nee atu lao ba oin, sira sakrifika uma, lakon rendimentu, edifisiu balun, hirak nee sosiedade iha konsiensia duni, sira fo no sobu, problema laos estadu selu, maibe hatudu sira nia vontade didiak tebes.
(joa)
