DILI, STLTIMORLESTE.com – Ministru Interior (MI), Francisco da Costa Guterres hatete, alerta rede scam call center neebe antes akontese iha Kambodia no Xina, daudaun nee target ona nasaun ASEAN inklui Timor Leste, hodi halao atividade ilegál.
Nia dehan, kazu scam call center nee laos akontese deit iha Timor Leste, maibe kazu nee daudaun akontese iha nasaun barak liu-liu iha Kambódia no Xina rasik.
“Ema sira nee target ona ba nasaun neebe sira bele opera. Sira duni tuir hela ita, tama mai halao atividade ilegal iha rai laran,” hatete Ministru Interior (MI), Francisco da Costa Guterres ba jornalista sira iha Palasiu Governu, Kuartu (12/08/2026).
Nia deklara, grupu krime organizadu nee uza viza turizmu no fasilidade Free Viza hodi tama ba nasaun sira. Hafoin nee sira rekruta ema no halo operasaun liu husi telefone no internet.
Tanba nee, Ministru Interior hatutan katak, Governu iha ona planu atu kombate kazu nee. “Ita sei envolve instituisaun relevante sira hamutuk iha laran. Depois ita halo analiza atu haree nia tendensia no mekanizmu saida mak bele kombate krime nee iha Timor Leste,” nia koalia.
Nia informa, Instituisaun neebe sei envolve mak PNTL, DSIK, Imigrasaun, MTK no Ministériu Públiku.
Francisco Guterres husu ba públiku atu atensaun nafatin, liu-liu ba joven sira neebe simu proposta servisu ho saláriu boot liu husi rede sosial.
“Se iha suspeita ruma, favor hatoo kedas ba autoridade. Ita labele fo espasu ba rede krime nee atu buras iha ita nia rai,” nia apela.
Ministru Interior garante katak se hetan estranjeiru neebe komete kazu hanesan nee, Governu sei foti medida legal no deporta kedas husi rai laran.
(jen)
