DILI, STLTIMORLESTE.com – Primeiru Ministru (PM), Kay Rala Xanana Gusmão husu parte hotu atu servisu fuan ho laran, nunee bele lori rai Timor Leste nee ba oin.
Primeiru Ministru, Kay Rala Xanana Gusmão hatoo lia hirak nee liu husi nia diskursu, bainhira halo sorumutu ho Ministeriu Obras Publika no Membru CCI-TL hametin parseria Governu no setor privadu iha dezenvolvimentu infraestrutura no ekonomia Timor Leste iha Salaun Delta Nova, Kinta (13/08/2026).
Primeiru Ministru Xanana Gusmão hatete, mai iha nee atu koalia buat ruma kona-ba dezenvolvimentu nasional.
“Depois 24 anos ukun aan, ita sei iha prosesu rua, prosesu konstrusaun estadu, iha prosesu konstrusaun estadu koalia konaba instituisaun do estadu, Prezidensial, Parlamentu, Governu, Justisa, ho instituisaun seluk tan, tenke servisu ho laran, serbisu ho diak hodi servi rai ida nee,” katak Primeiru Ministru.
Primeiru Ministru hatete, entidade oin-oin presiza servisu hamutuk ho fuan laran nunee servi rai nee ho diak, nee mak konstrusaun estadu.
“24 anos liu tiha ita haree katak sei iha frakeza barak,” katak PM.
Xefe Governu hatete, iha prosesu seluk mak konstrusaun nasaun, no konstrusaun nasaun mak Estadu hamutuk ho setor privadu no ONG.
Iha rai neebe ukun aan kleur tebes ona sira nia setor privadu lao mesak maibe iha Timor Leste foin mak lao mak Estadu, Governu buka oinsa dudu setor privadu hodi loke dalan ba dezenvolvimentu ba ekonomia Timor Leste.
“Tanba ita ukun aan tinan 24 ona, ita sei depedente tebes iha ekonomia, tanba nee mak dezenvolvimentu infraestrutura no ekonomia Timor Leste,” katak PM Xanana.
PM Xanana hatete, temi kona-ba kafe Atsabe, ida nee ezemplu neebe kapas tebes, tanba hahu husi buat ida halo oin oin hodi dezenvolve kafe iha Timor no mundu.
(eme)
