DILI, STLTIMORLESTE.com – Jesus hanorin ema atu perdua malu, husi perdua mak bele hamoos sala sira neebe mak halo iha pasadu hodi moris tuir fali dalan neebe los.
Lia hirak nee hatoo husi Padre Paul Kerans, SVD ba STL Kinta (13/08/2026) hatete, evanjelhu ba loron ohin foti husi evanjelhu Mateus 18:21–19:1 Jesus koalia konaba perdaun.
“Iha Evanjelhu ohin nian, Jesus koalia mai ita konaba perdaun loos nia furak no klean. Ninia perdaun laos perdaun parsial neebe nakonu nafatin ho laran moras, maibe perdaun kompletu no inkondisional. Ida nee mak perdaun la ho laran-moras ka laran moras. Perdaun mak bele hamoos ita nia pasadu nia mancha nakukun sira no troka sira ho kor nabilan sira esperansa nian, kura nian, no inísiu foun sira,” dehan Padre Paul.
Padre hatete, husi Jesus nia liafuna neebe hatete iha evanjelhu halo ema idak-idak bele halo refleksaun ba nia aan, katak bele perdua duni hanesan Jesus halo ka lae? maibe ema nia perdua la.hanesan Jesus tanba ema baibain no Jesus nee Maromak neebe perdua no sakrifika nia aan ba mate hodi kasu ema nia sala.
“Maibe iha reflesaun, ita bele husu ba ita nia aan, hau bele perdua duni hanesan Jesus? Ita barak ho instintu hatete hau labele. Tanba sa? Tanba ita hanoin katak hau ema deit no Jesus mak Maromak. Hau limitadu, no Nia laiha rohan,” dehan Padre.
Se ida nee mak ema nia logika, ema tenke hanoin lia los, ida nee Jesus laos deit perdua ema, Nia mos sakrifika nia moris ba ema iha krus, Nia fo perdua ba sira neebe trai Nia, nega Nia, no hedi Nia iha krus. Ninia mizerikordia no ezemplu neebe labele sukat laos deit inspira ema maibe mos muda ema.
“Se mak ita nia modelu sira ba perdaun? Jesus, neebe nia domin laiha limite, ka atan neebe la perdua hanesan iha Evanjelhu ohin nian neebe labele hatutan mizerikordia neebe nia simu ona? Perdaun laos frakeza, nee mak Maromak nia kbiit neebe servisu iha ema nia fuan. Bainhira ita hili atu perdua no perdua, ita hili atu husik Maromak nia grasa suli liu husi ita. Hodi halo nunee, ita laos deit liberta ema seluk, maibe ita mos liberta ita nia aan rasik,” katak Padre.
Iha biban nee Padre hatete, ema sala nain la ses husi sala, husi hahalok neebe halo hakanek ema seluk nia fuan no setimentu nuudar humanu ema sala nain hakbesik aan ba malu hodi husu fali perdua ba malu, husi atitude neebe halo ho perdaun sei hetan grasa Maromak nia neebe suli husi ema ida ba ema seluk.
Bibi atan kreda katolika nee hatete, husi refleksaun ba loron ohin neebe koalia konaba perdaun fanu ema idak-idak atu fila ba malu hodi husu perdaun ba malu, tuir buat neebe Jesus rasik hanorin ba ema hotu katak ema idak-idak presiza hadomi malu no hadomi ema seluk hanesan aan rasik. No perdua malu bainhira koalia ka halo sala ba malu.
Nunee mos Padre Rikardus Pasang, SVD hatete, reflesaun ba loron ohin foti husi Evanjelhu (Ez 12:1-12 & Mt 18:21 – 19:1) presiza perdua malu hodi lao tuir Maromak nia hakarak.
“Hatete perdaun sem limite, Nai haruka aroma ba, husik moru ulun toos, Keta sai ema refugiadus husi uma domin no dame nian. Tanba fuan neebe la hakmatek, sei kanek ba nafatin, no diuk ba lian mamar Nai nian. Fila mai Hau,” katak Padre.
Padre hatete, Pedro husu hodi konta, Jesus fo resposta la iha limite, dala 70 dala 7, apaga debe sala hanesan aman apaga ema nia sala.
Padre dehan, keta kaer odiu maski kiik deit hanesan dolar 100, wainhira krus Jesus nian apaga ona sala 10.000.
“Halo fatuk sai uvas, Nai Jesus moris nia hun, hanorin ami sai hanesan Maria atentu, sensitivu, orasaun, no guia. Iha fuan rua tolu neebe perdua malu. Ita boot presensa no uma mamuk Ita ense fali” katak Padre.
(eme)
