DILI, STLTIMORLESTE.com – Primeiru Ministru (PM), Kay Rala Xanana Gusmão hatete, mina folin sae tanba impkatu funu iha mediu oriente, husu hotu-hotu hamutuk hodi rezolve problema sira nee, labele hirus malu no fila kotuk ba malu.
Primeiru Ministru, Kay Rala Xanana Gusmão hatoo lia hirak nee liu husi nia diskursu, bainhira halo sorumutu ho Ministeriu Obras Publika no Membru CCI-TL hametin parseria Governu no setor privadu iha dezenvolvimentu infraestrutura no ekonomia Timor Leste iha Salaun Delta Nova, Kinta (13/08/2026).
PM Xanana hatete, daudaun nee mina folin sae makaas iha Timor Leste, tanba impkatu husi funu iha Mediu Oriente.
Primeiru Ministru, Kay Rala Xanana Gusmão husu Ministeriu Obras Publika nomos ADN atu tau atensaun makaas, tanba mina no alkatraun folin sae sei fo mos impaktu ba projetu sira neebe halo konstrusaun infraestrutura iha Timor Leste.
“Hau bolu hela atensaun ba MOP no ADN, tanba mina agora sae, se mina sae, osan neebe ita kalkula ba projetu ida ita labele temi dehan katak ba projetu mina sae ho vensimentu folin sae, alkatraun folin sae, buat sira nee hotu ADN tenke haree ajusta didiak, funu nee laos ita mak halo maibe funu iha Mediu Oriente mina sae tan deit agora US$ 90 por bariel,” katak PM Xanana.
Iha biban nee Primeiru Ministru husu parte hotu labele hirus malu no labele halo problema, maibe presiza hamutuk hodi rezolve problema iha rai laran.
“Funu iha liur ita hetan impaktu sira hanesan nee, ita iha nee lalika hadook malu, lalika funu, lalika problema, ajuda malu rezolve problema sira, iha neebe ita bele rezolve bele rezolve, iha neebe labele ita bele foti too parlamentu mos ita foti hodi rezolve,” katak PM Xanana.
Nunee mos Ministru Obras Publika, Samuel Marcal hatete, haree ba problema sira nee mak ohin halibur hamutuk hodi identifika hamutuk ida neebe mak presiza hadia no ida neebe mak presiza ajuda.
“Ho ida nee mak ohin rona setor privadu sira, hau labele dehan kombustivel se sira la sente problema hau mak ba kestiona fali problema iha neeba, entau sira mak tenke kestiona sira nia problema nee iha neebe, afeita ka lae? kombustivel sae afeita duni ba sira nia konstrusaun ka lae? ita tenke rona husi sira depois mak halo rezumu ida hatoo ba Primeiru Ministru hodi lori ba Konselhu Ministru para haree rezolusaun ruma para haree hodi hadia buat sira nee,” katak Ministru.
Tuir Ministru nia haree daudaun nee projetu hira mak abandona? hatan ba kestaun nee Ministru hatete, projetu neebe mak abandona hamutuk 56.
Tuir informasaun neebe STL hetan produsaun tun iha fulan Julhu, produsaun mina iha Mediu Oriente tun hamutuk 5.5 milhaun baril kada loron. Nunee oferta global menus.
Folin iha merkadu Timor Leste fulan Abril too Agostu 2026 tuir dadus husi stasaun mina ETO Gasolina US$ 1.35/litru, Dizel US$ 1.48/litru, Pertamina Gasolina US$ 1.50/litru, Dizel US$ 1.65/litru Media Dili Gasolina $1.23 – US$ 1.50/litru, Dizel US$ 1.40 – US$ 1.65/litru.
(eme)
