BRAZIL, STLTIMORLESTE.com – Liu husi Komunikadu Impresa Media F-FDTL neebe STL asesu katak, Membru FALINTIL-Forsa Defesa Timor Leste (F-FDTL) neebe lidera husi Koronel Tirosinadu Mário Baptista “Bersama”, partisipa iha Ezersísiu FELINO 2026, neebe organiza husi Comunidade dos Países de Língua Portuguesa (CPLP), iha Foz do Iguaçu, Estadu Paraná, Brazil.
Ezersísiu FELINO nee halao ho objetivu atu hasae interasaun no uniformiza tatika, operasionál no estratejika entre Forsas Armadas CPLP, liu-liu iha area operasaun apoiu ba pas no asistensia umanitaria.
Objetivu seluk husi ezersísiu nee mak atu hatudu ba Nações Unidas (ONU) konaba kapasidade CPLP nian atu halao operasaun apoiu ba pas no asistensia umanitaria iha kualker parte iha mundu. Kapasidade nee inklui mos resposta ba situasaun kalamidade no dezastre natural sira.
Iha ezersísiu nee, nasaun membru CPLP sira partisipa ho exesaun ba Guiné-Bissau, São Tomé e Príncipe no Cabo Verde. Total efetivu liu husi 700 Militár partisipa diretamente iha atividade sira iha teren.
Ezersísiu FELINO 2026 hahu iha loron 10 Agostu no sei remata iha loron 20 Agostu 2026.depois delegasaun F-FDTL neebe partisipa iha ezersísiu nee kompostu hosi Xefe Ekipa, Koronel Tirosinadu Mário Baptista “Bersama”,Tenente-Koronel Jacinto Soares; Tenente-Koronel Gregório Bernardo Correia; Tenente-Koronel Hélio da Costa; Tenente-Koronel Yosep Taek; Kapitãu Fragata Nicolau Sousa; Primeiru-Tenente Simão; Kapitãu José António; no Alferes Cesário.
Entretantu, hanesan parte husi programa ezersísiu, Xefe Estadu-Maior Jenerál Forsas Armadas CPLP sei partisipa iha Dia do Visitante Ilustre (DVI), neebe sei sai nuudar momentu observasaun no serimonia enserramentu ba Ezersísiu FELINO 2026.
(jen)
