DILI, STLTIMORLESTE.com – Parlamentu Nasional (PN) liu husi Bankada Partidu Kongresu Nasional Rekunstrusaun Timor (CNRT) apoiu Governu impresta orsamentu milhaun US$ 30 husi Banku Mundial, hodi finansia projetu abastesimentu bee moos iha Kapital Munisipal Baucau.
Deputada Bankada CNRT, Virgina Ana Belo hatete, hanesan reprezenta povu iha Parlamentu Nasional, nia parte apoiu tebes desizaun neebe Konselhu Ministru foti ona, tanba tinan barak ona populasaun sira hela iha Baucau Vila la asesu ba bee moos no kada loron sira tenki hola bele hodi uza ba nesesidade loro-loron nian.
“Neebe espera ho ida nee bele ajuda ita nia populasaun sira, tanba iha Baucau tinan barak hau nia familia rasik iha neeba sira tenki sosa bee kada loron, durante tinan naruk ona dezde governasaun anterior too agora,” hatete nia ba jornalista sira iha Parlamentu Nasional, Kinta (13/08/2026).
Deputadu Virgina afirma, problema bee moos nee hanesan problema boot neebe tinan barak populasaun hotu-hotu iha teritoru laran enfrenta laos deit iha Munisipiu Baucau maibe inklui mos munisipiu sira seluk hanesan iha kapital Dili.
Nia dehan, oras nee governu hadia estrada iha fatin, eviksaun no resproriasaun ba ema nia uma sira nee, tan nee problema bee moos nee sai kestaun ida neebe krusial tebe-tebes, neebe governu presiza rezolve.
Nia sublina, orsamentu finansia projetu governu sei impresta husi Banku Mundial, tanba ba oin se iha ona konkordansia atu impresta orsamentu nee mak presiza utiliza didiak hodi finansia projetu nee.
“Hau fiar katak Ministeriu Finansas iha kapasidade atu jere orsamentu imprestimu mesku kee ita iha imprestimu lubuk ida maibe hau fiar sira sei bele halo jestaun diak ba orsamentu neebe mak iha nunee labele fo todan ba ita nia jerasaun sira tuir mai,” dehan nia.
Nia mos reforsa liu tan katak, orsamentu imprestimu ho funan kiik, tan nee sei la fo impaktu makaas, tanba governu iha politika garante imprestimu nee liu husi fundu minarai neebe iha.
“Ita boot sira hatene politika governu nian foti osan, maibe ninia garantia nee mak ita nia osan iha fundu petroliferu para selu nee ho tinan naruk ho funan kiik,” tenik nia.
Molok nee Konselhu Ministru delibera hodi autoriza Ministra Finansas, Santina José Rodrigues F. Viegas Cardoso atu negosia ho Banku Mundial ba kontratasaun emprestimu ida, liu husi Asosiasaun Internasional Dezenvolvimentu (IDA), neebe destina ba finansiamentu Projetu Abastesimentu Bee iha Kapital Munisipal Baukau (Baucau Municipal Capital Water Supply).
Projetu nee, integra iha faze daruak inisiativa rejional Seguransa no Reziliensia Idriku Banku Mundial nian, ho objetivu atu hasae asesu ba servisu abastesimentu bee neebe jere ho seguru iha area selesionada sira iha Baukau, neebe envolve konstrusaun no operasaun sistema sentralizadu ida neebe reziliente ba mudansa klimatika, ho kapasidade atu benefisia besik ema 37.000 too tinan 2031.
“Ho finansiamentu neebe prevee ho milhaun US$ 30, projetu nee inklui reabilitasaun no espansaun ba fonte no sistema bombajen neebe iha, konstrusaun kaptasaun foun, estasaun bombajen, konduta, instalasaun tratamentu no armazenamentu, inklui mos instalasaun ba ligasaun domestika besik 7.000 ho mikrometria,” haktuir nota komunikadu neebe STL husi governu, Kuarta (12/08/2026).
(alb)
