DILI, STLTIMORLESTE.com – Prezidente Republika (PR), Jose Ramos Horta promulga ona dekretu lei rejime subvensaun publika ba orgaun Komunikasaun Sosial (KomSos) sira.
Tuir artigu 1 objetu no ambitu aplikasaun nian. Dekretu nee aprova rejime subvensaun publika ba meius komunikasaun sosial publiku ka privadu sira neebe rejista legalmente neebe halao operasaun iha territoriu nasional.
Nunee mos artigu 2 objetivu sira rejime subvensaun publika neebe aprova husi dekretu ida nee ho objetivu atu halao objetivu sira tuir mai nee. Atu garante sirkulasaun livre informasaun nian no asesu livre ba produtu informasaun nian.
Prezerva no defende pluralizmu no kompetisaun, fo kontribuisaun ba formasaun profisional media nian, kontribui ba ezersísiu plural no robustu ba liberdade no direitu atu informa no hetan informasaun iha ambitu meiu komunikasaun sosial nian, tuir termu no limite neebe estabelese iha Lei-Inan no lei. Fo apoiu ba meius komunikasaun sosial sira hanesan veíkulu prosimidade ba asesu ba informasaun iha nível munisípiu, rejional no lokal.
Atu enkoraja kriasaun, sustentabilidade, kompetitividade no inovasaun meius komunikasaun sosial munisípiu, rejional ka lokal, nomeadamente liu husi apoiu ba uzu intensivu liu tan teknolojia foun sira.
Promove hadiak kondisaun sira ba asesu no pratika jornalizmu no kapasidade ba produsaun konteudu. Promove leitura, alfabetizasaun no inkluzaun sidadaun sira nian iha relasaun ho media. Atu hasae dezenvolvimentu parseria no kolaborasaun entre meiu komunikasaun sosial nasional sira no meiu komunikasaun sosial munisípiu, rejional ka lokal sira, nomeadamente liu husi inisiativa sira neebe permite sirkulasaun boot liu no fahe rekursu sira.
Artigu 3 apoiu seluk
Eskema subsídiu publiku ida nee la taka dalan ba fo ba media nasional sira apoiu seluk ruma neebe bele fo husi entidade privadu nasional, estranjeiru ka internasional sira.
(eme)
