DILI, STLTIMORLESTE.com – Prezidente Republika (PR), Jose Ramos Horta hatete, buat neebe Estadu no Governu kontribui ba ASEAN mak hametin dame iha rai laran.
Prezidente Republika, Jose Ramos Horta hatoo lia hirak nee ba jornalista sira iha Palasiu Prezidensial Nicolau Lobato, Bairo Pite, Sesta (14/08/2026) hatete, buat neebe kontribui husi Estadu no Governu ba ASEAN mak hametin dame iha rai laran.
“Hau nia mensajen boot liu mak ida nee, saida mak ita bele kontribui Governu estadu ba ASEAN, kontribui ba ita aan rasik ba Familia Timor ba aldeia, Suku hametin dame iha rai laran, nee mak objetivu boot no ba lider sira ASEAN, Timor dame metin nafatin estabilidade sira kontente tanba iha ASEAN laran iha problema, Mianmar funu makaas,” katak PR Horta.
Iha biban nee Prezidente Republika, Jose Ramos Horta husu estudante sira kontinua estuda, tanba nasaun nee ba oin presiza ema neebe matenek.
“Ba joven sira estuda, estuda, estuda, labele para estuda makaas, estuda klean iha difikuldade hahan laiha, nee los duni, tanba estudante balun husu ba sira ohin ita han saida, sira dehan han dosi, fossa husi dader hader mai han mak dosi deit, balun la han ba deit kampus, nee mak prokupasaun boot, depois iha foho pior liu kondisaun la diak,” katak PR Horta.
Xefe Estadu hatete, estadu iha obrigasaun tenke tau orsamentu maibe laos deit ba Ministeriu Edukasaun maibe orsamentu neebe konsidera hadia estudante sira nia estuda fatin.
“Hau kontente tanba agora Governu mos tau osan oituan ba kada familia, kada membru familia ladun boot maibe sira ba eskola nee hotu-hotu simu US$ 7, por mes o tau US$ 7 hamutuk ho kolega sira nee bele ajuda ona oituan,” katak Horta.
PR Horta hatete, importante liu mak tau matan mak profesor sira, no tenke dignifika profesor sira husi pre-eskolar too universidade, profesor Universitariu balun nia manan US$ 300, ida nee Governu tenke haree tau ajuda ruma, nunee selu profesor sira diak liu. Tanba Koalia konaba edukasaun tenke haree mos buat konkretu ba ema nia moris.
Aleinde nee Preziente Republika hatete, nia simu informasaun maibe nee laos kompetensia Prezidente nia, kandidatu lubuk ida ba tribunal rekursu no supremu tribunal nee juri internasional ida mai husi Portugal, sira mak sei kontrola ida nee para fo neutralidade integridade maibe kandidatu lubuk ida los.
Prezidente nia mandatu no responsabilidade ida deit atu nomeia Prezidente Tribunal Supremu maibe la nomeia arbiru mai husi grupu neebe liu husi ezame.
“Hau hili tuir kandidatu sira neebe kumpre tiha ona regra prosedimentu kondisaun neebe lei fo sai, hotu-hotu sei liu husi kursu formasaun ida nee laos Juiz sira mak la hatene tuir formasaun lae? Buat hotu hotu ita tenke tuir adaptasaun ruma, kursu husi semana ida ka fulan ida nee normal,” katak PR Horta.
(eme)
