DILI, STLTIMORLESTE.com – Prezidente Republika (PR), Jose Ramos Horta sei halo proposta ida ba Regional Manager ASEAN husi Qatar, nunee bele hatun folin bilhete aviaun ba Timor oan sira.
Prezidente Republika, Jose Ramos Horta hatoo kestaun nee ba jornalista sira iha Palasiu Prezidensial Nicolau Lobato, Bairo Pite, Sesta (14/08/2026) hatete, Prezidente iha ona hanoin atu halo proposta ida ba Regional Manager ASEAN, nunee bele hatun bilhete aviaun ba Timor oan sira neebe viajen husi Malazia ba Inglatera ka fatin seluk.
Prezidente Republika hatete, iha Kinta halo enkontru ho Dato Muzammil Bin Mohammad nuudar Regional Manager ASEAN husi Qatar, iha enkontru nee Manajer ASEAN hatete, daudaun nee Timor oan no estudante barak mak viajen ba Inglatera no fatin seluk transit iha Malazia, ho ida nee Prezidente iha ona hanoin atu halo programa ruma, nunee sira bele apoiu Timor oan ho folin baratu.
Prezidente dehan, iha enkontru sira interesadu deit haree dada pasajeiru husi Timor, tanba sira hatete Timor oan lubuk ida liu husi Malazia ba Inglaterra ba Eropa, entaun sira hakarak haree se bele iha programa ruma ke sira bele apoia hanesan presu espesial.
“Hau sei hanoin depois sei halo proposta ida ba sira bele mos akordu espesial ruma ho Governu, maibe hau hakarak haree tanba nia rasik mak temi Timor oan barak estudante no trabalhador neebe ba Inglaterra ka husi Malazia, tanba nee hau hakarak halo programa espesial ida sira bele oferese karik bilhete neebe baratu liu, labele gratuita maibe baratu nee mak hau nia unika idea preokupasaun,” dehan PR Horta.
Iha biban nee Prezidente Republika mos hatete ba Regional Manager ASEAN, Dato katak, iha Prezidensia Republika nunka sosa bilhete liu husi ajensia viajen maibe sosa husi online, tanba sosa husi online baratu liu fali presu aviaun nia rasik.
Kontaktu aviaun kompanhia folin mak ida nee, kontaktu liu husi online deit bele kmaan liu fali kompanhia, nia rasik hatete dala ruma sosa husi kompanhia dala ruma halo lakon osan.
“Sira mai tanba interesadu, maibe hau mos hakarak haree ba oin, tanba Aeroportu foun hadia daudaun, kuandu prontu nee laos sira deit maibe Emirates Arabe, Qatar mos sei mai liu husi Timor hanesan mai husi Sydney para iha nee liu, Aeroportu tinan 2 kuandu prontu. Daudaun nee sira halo daudaun ona estudu hau koalia dala hira ona ho Qatar, Emirates Arabe, para halo transit iha Timor Leste.
Nunee mos Dato Muzammil Bin Mohammad nuudar Regional Manager ASEAN husi Qatar ba hatete mai halo enkontru ho Prezidente Republika Jose Ramos Horta iha Palasiu Prezidensial, hodi koalia konaba distinasaun viajen Timoroan nia.
“Ohin ami mai hakarak introdus aan deit no koalia konaba viajen sira nee husi sira sei halo destinasaun. Ami foin intrude no briefing ba Prezidente konaba destinu sira neebe semo ho aviaun ba, husi Timor ba Bali hira, husi Kuala Lumpur hira, no oinsa konaba husi Timor Leste dirije ba Europa, Amerika, Amerika Sul liu husi Doha,” katak nia.
Tuir observasaun neebe STL hetan iha loron Kinta, Prezidente Republika Jose Ramos simu ekipa husi Dato Muzammil Bin Mohammad nuudar Regional Manager ASEAN husi Qatar iha palasiu Prezidensial hodi halo enkontru ofisial.
(eme)
