DILI, STLTIMORLESTE.com – Relasiona ho krime sira neebe akontese, Primeiru Ministru (PM) apela katak, Timor Leste (TL) laos paraisu ba krime.
Tuir Primeiru Ministru, Xanana Gusmao katak, ita nuudar membru foun ba ASEAN ema aproveita ida nee, tanba hanoin katak ita la preparadu, dehan husik ba ema laos naok ita nia osan.
Nunee ema joga tun joga sae ita mak sai hanesan kampu futebol, ema joga tiha menan la menan sira fila ita mak hanesan kampu futebol ida.
“Neebe ita atu fo hatene ba ASEAN tomak no ba mundu tomak katak, ita laos paraisu ba krime, ida nee mak hau mai hasoru sira, agradese koalia ho sira,” dehan Primeiru Ministru ba jornalista sira iha edefisiu PSIK, hafoin remata enkontru ho Interpol Sesta, (14/08/2026).
PM afirma, Diretor PSIK iha ona programa no Interpol sei mai beibeik, iha nee mos iha laboratoriu konaba forensik nian sira mai prepara hare.
Nia sublina, Interpol sira haree ita nia ema sira preparadu ona ka seidauk preparadu, sira sei mai aumenta nafatin ita nia kbiit, politika ida dehan zero toleransia tenke iha.
Iha fatin hanesan, Porta Voz PSIK, Mario Tavares dehan, pozisaun PSIK kumpri ba politika estadu nian.
“Politika Estadu zero toleransia ba krime sira nee, pozisaun PSIK nian kumpri saida mak politika estadu nian, esforsu makaas atu kombate iha kualker sirkunstansia konaba krime Scamming call centre nian,” dehan nia.
Hatutan tan, Interpol mai ho nia ekipa teknika sira nain haat maka mai fo hela apoiu tekniku, fo mos kapasitasaun ba kuadru PSIK sira atu kombate ho diak liu tan iha futuru.
Sublina, apoiu tekniku hanesan formasaun pesoal direta sira mos lori sira nia ekipamentus balu hodi haree halo avaliasaun mos ba ita nia ekipamentus neebe iha tiha ona, atu ita bele prontu halo ezaminasaun ba objeitu sira neebe hetan aprensaun.
(ter)
