DILI, STLTIMORLESTE.com – Ministeriu Publiku (MP) lakon figura diak ida Prokuradora Ivonia Maria Guterres, neebe durante nee halao knaar hanesan Prokuradora iha Tribunal.
Prokuradora Ivonia antes nee halao knaar iha Tribunal Judisial Primeira Instansia Dili (TJPID), no prosesu neebe Prokurador sai hanesan Prokuradora ba prosesu, barak liu mak prosesu neebe ho nia natureza Violensia Domestika (VD).
“Hau konhese kleur ona Doutora Ivonia Maria Guterres, iha altura kuandu nia nuudar Majistradu iha tempu UNTAET, feto ida neebe iha integridade no potensial hodi halo knaar nuudar Majistradu Ministeriu Publiku iha tempu naruk,” dehan Defensor Publiku, Sergio Dias Quintas ba STL iha Dili, Sesta (14/08/2026).
Sergio konta, wainhira Prokuradora moras, Prokuradora sei iha korajen no pasiensia hodi tuir julgamentu iha Tribunal, mezmu dala ruma Prokuradora nia saude la permite.
Sergio profunda, nuudar Majistradu Ministeriu Publiku, Doutora Ivonia dala barak defende feto maluk sira no labarik sira nia direitu iha Tribunal.
Sergio dehan, Doutora Ivonia nia mate husik hela memoria ida importante ba setor justisa, liu-liu Ministeriu Publiku neebe lakon figura ida importante iha knaar Ministeriu Publiku nian.
(ter)
