DILI, STLTIMORLESTE.com – Prezidente Republika (PR), Jose Ramos Horta husu Tribunal fo pena todan ba Onkum Polisia Nasional Timor Leste (PNTL) ida neebe tiru mate joven ida iha Postu Administrativu Uatucarbau, Munisipiu Viqueque.
Prezidente Republika, Jose Ramos Horta hatoo kestaun nee ba jornalista sira iha Palasiu Prezidensial Nicolau Lobato, Bairo Pite, Segunda (17/08/2026) hatete, nia la aseita asaun elementu PNTL neebe lori kilat ba halo kontrolu iha Tranzitu hodi hamate joven ida iha Uatucarbau.
“Komandante Jeral PNTL hatene atu halo saida, primeiru ba Becora, segundu Julgamentu sei hetan pena todan, no tenki halo esplikasaun ruma tansa ema nunee ba halo fali kontrolu iha tranzitu, nee so ema bulak ten boot ida ou lanu mak halo nunee,” dehan Prezidente Republika.
Prezidente Republika hatete nia la aseita, tanba nee tenki prosessu Explusaun forsas no justisa mak haree no tenki ba iha kadeia todan, tanba nee halo aat ba instituisaun PNTL nia naran, no halo kontrolu tranzitu tanba sa lori fali kilat ba kontrolu iha Tranzitu.
“Hau hatete kuandu hau ba Guinea-Bissau iha tinan 2013, nuudar reprezentante Sekretariu Jeral iha Guinea-Bissau situasaun neebe difisil tebes elementu siguransa Timor ba ho hau, hau proibidu la bele lori kilat, no laiha ida elementu ONU iha Guinea-Bissau neebe servisu ho hau, hau mos la autoriza sira lori kilat, besik tinan rua iha neba situasaun manas los iha neeba agora ba halo kontrolu tranzitu iha Dili lori fali kilat,” dehan PR Horta.
Prezidente hatete, Komando PNTL tenke foti asaun neebe rigor ba Oknum PNTL neebe tiru sidadaun Silvano Gomes, idade 30, iha Suku Irabin de Baixo, Postu Administrativu Uatucarbau, Munisipiu Viqueque, ikus hakotu ona iis iha Hospital Nasional Guido Valadares (HNGV) Dili.
Vitima refere orijen husi Aldeia Beturia, Suku Irabin de Baixo, neebe iha loron 15 Agostu nee pur-volta tuku 08:00 dader ho motor KLX mak hetan insidente “tiru” husi membru Polisia tranzitu, iha area besik eskola EBC 13, Aldeia Taraday, Suku Irabin de Baixo, tanba deskonfia vitima ho motor la uza kapasete.
Xefe Estadu hatete, nia afirma katak kazu hanesan nee tenki liu husi prosesu espulsaun forsas no justisa mak haree tenke iha kadeia todan, tanba nee halo aat ba instituisaun PNTL nia naran.
(eme)
