DILI, STLTIMORLESTE.com – Prezidente Republika (PR), Jose Ramos Horta kondekora Medalha Solidaridade ba veteranus Australia hamutuk 36 iha Palasiu Prezidensial.
Bainhira remata entrega medalha solidaridade, Prezidente Republika Jose Ramos Horta ba jornalista sira iha Palasiu Prezidensial Nicolau Lobato, Bairo Pite, Segunda (17/08/2026) hatete, iha hasoru malu ho elementu Forsa INTERFET neebe serbisu iha Timor Leste iha tinan 1999, 2000 no 2001. Iha biban nee Prezidente entrega medalha solidaridade ba sira nuudar rekordasaun ba sira nia kontribuisaun ba Timor Leste iha tempu neebe difisil.
Prezidente Republika hatete Medalha Solidaridade nee buat simples deit. Laos osan mean ka osan mutin, maibe ida nee símbolu deit atu hatudu Timor Leste nia gratidaun.
“Grupu hau kondekora nee sira elementu Forsa Interfeti ha 1999 no 2000 no 2001 tanba premeira vez mak sira mai premeira vez mak identifika sira husu se bele kondekora sira medalha simples medalha solidaridade, uluk hau premeiru mandatu fo ba polisia ONU, militar Onu ema lubuk ida rihun ba rihun,” dehan Prezidente Republika, Jose Ramos Horta.
Prezidente Republika hatete, elementu sira nee tinan hira nia laran nunka hetan rekoinesementu no ohin kondekora nee hanesan lembransa ida ho Medalha solidaridade.
“Entau sira husu hau se bele, balun uluk hela iha tinan fulan 6 serimonia entrega, Polisia ONU mos fulan 6 entrega hetan kondekorasaun ida nee buat simples ba sira hanesan lembransa,” katak Horta.
PR dehan grupu nee hola parte grupu boot veteranus sira 1999 nia, too 2012 depois Interfet Nasoens Unidas, Militar Australia, Nova Zelandia sira fila fali mai iha nee iha 2006-2012. Entau ema husi Australia, Nova Zelandia neebe serbi iha Timor Leste tempu neeba rihun ba rihun, entau senhor Mistow uluk major iha nee no asesor mos Prezidente Republika nia iha premeiru mandatu organiza grupu ida.
Xefe Estadu hatete, sira membru atus ba atus ona influensia boot iha Australia, sira mai tinan-tinan dala tolu ka dala haat grupu ida iha ema nain 30 sira viajen mai Timor Leste tomak ajuda halo eskola balun ajuda halo rehablitasaun sira mobiliza finansiamentu iha Australia mai ajuda halo eskola halo ema nia uma sira viajen ba Timor laran tomak laos mai deit Dili.
Ema sira nee influensia boot liu husi sira nia media sosial fahe imformasaun nee hatutan too ema rihun ba rihun mak akompanha Timor.
“Liu liu agradese ba sira ba sira nia Governante, tinan kotuk ba TL 1999-2000 neebe akompanha TL agradese ba sira,” katak PR Horta.
Xefe Estadu hatete kondekorasaun nee ho medalha simples liu ho medalha solidaridade laos osan mean laos osan mutin maibe ida nee medalha neebe simples liu, ho naran medalha solidaridade laiha grau ida nee simbolika deit.
Nunee mos Veteranus husi Australia Keith Mason hatoo sentimentu haksolok ohin bele hasoru malu ho Prezidente Republika Jose Ramos Horta iha Palasiu Prezidensial.
Iha biban nee nia mos hatoo agradese ba povu Timor Leste neebe simu sira diak tebes desde uluk too mai ohin loron neebe sempre ho hamnasa.
“Ida nee mak nasaun ida neebe furak no nia ema mos furak no amigavel liu,” katak veteranus Australia.
(eme)
