DILI, STLTIMORLESTE.com – Defensor Publiku estajiadu nain haat (4) remata ona sira nia faze estajiu, hodi simu pose sai hanesan Defensor Publiku ba kursu VII.
Defensor nain haat neebe simu pose mak hanesan Defensor Emilio Fatima Pereira Ribeiro, Defensor Geanini Daos, Defensor Mateus Bento Guterres no Defensor Diamentino Morais.
“Defensor Publiku foun simu responsabilidade boot ida laos deit ba sira nia aan rasik, maibe ba komunidade no sistema justisa, sai Defensor Publiku laos deit hatene lei no defende kliente maibe sai Defensor Publiku signifika defende direitu ema nian promove justisa, proteje ema sira neebe presiza protesaun juridika no kontribui ba harii Estadu Direitu neebe forte no demokratiku,” dehan Defensor Publiku Jeral, Cansio Xavier iha nia intervensaun pose ba Defensor nain haat, iha sala Auditoriu Ministériu Justisa, Segunda (17/08/2026).
Nia hatutan, profisaun iha nee presiza konhesimentu moral, korajen independensia etika no integridade. Iha profisaun nee sei iha dezafiu barak, situasaun neebe obriga atu foti desizaun neebe difisil, wainhira hasoru situasaun sira nee sempre lembra katak, dignidade profisaun tenke sai hanesan prioridade.
Sublina, atu sai hanesan Defensor Publiku neebe kompetente, maibe labele haluha iha integridade, iha korajen forte, keta loko aan, defende kliente ho determinasaun, maibe sakrifika lia loos no justisa.
Afirma, lei no realidade kontinua muda iha mudansa sira nee tenke opta, kondisaun sira neebe ejize atu halo adaptasaun atu integra aan ho responsabilidade no akuntabilidade.
Nia dehan, tenke lembra katak iha kotuk sai prosesu juridiku ida diak iha ema ida idak nia familia ida esperansa ida, no dala barak futuru ema nian depende ba justisa. Tanba nee halao profisaun ho responsabilidade, umanidade no konsiensia.
Ita nia sosiedade laos deit presiza Defensor Publiku neebe profisional no iha kapasidade, maibe mos ema neebe iha prinsipiu no integridade hahalok diak no prudente bazeia ba valor no mos norma sira neebe opta iha ita nia vida profisional.
Salienta, presiza Defensor Publiku sira neebe iha korajen atu defende direitu sidadaun sira, iha independensia atu hateten verdade no iha integridade atu firma nafatin maske hasoru difikuldade.
Hatoo parabens ba Defensor nain haat tanba konkista neebe sira hatudu ona.
“Hau hakarak mos hatoo mensajen ida, ita boot sira nia nomeasaun ohin laos final, maibe komesa ida servisu ho responsabilidade ida foun. Hametin ita boot sira nia juramentu respeitu lei no justisa,” dehan Cansio.
Nia dehan, Defensor Publiku nia naran boot laos iha numeru kazu neebe manan, maibe numeru ema sira neebe simu ajuda no proteje liu husi Defensor nia servisu. Parabens ba esforsu atu sai Defensor Publiku atu ajuda hodi kontribui defende ita nia maluk sira iha asesu justisa ho diak.
Iha fatin hanesan, Vise Ministru Justisa, Paulo Remedios dehan, Defensor nia knar atu atende ema neebe kiit laek.
“Hau fo rekomendasaun iha hau nia palavra, Defensor Publiku tenke responsabilidade, tenke haree didiak estatutu Defensoria Publika sira nia knaar atu fo apoiu juridiku ba populasaun vulneravel, signifika populasaun la iha rekursu ekonomiku,” dehan nia.
Hatutan, Defensor Publiku nia knaar laos apoiu ba emprezariu no kompanhia sira, maibe ba ema neebe kbiit laek. Ministeriu Publiku ho apoiu Defensor Publiku Jeral fo tiha ona prosesu disiplinar ba Defensor Publiku neebe viola regra.
Esplika, foin primera vez Defensor Publiku Jeral fo sansaun ba Defensor Publiku.
“Sira neebe pose sira nia papel atu ajuda ema neebe kiak la iha finanseiru, laos reprezenta ema riku no kompanhia, nee labele, lei bandu proibidu,” dehan Vise MJ.
Defensor Publiku koalia ida nee dala barak ona, ita tenke komesa ona no Defensor Publiku implementa ona, se mak la kumpri hetan sansaun.
(ter)
