DILI, STLTIMORLESTE.com – Iha serimonia area bandeira Nasional Republika Indonezia, hodi komemorasaun loron proklamasaun independensia Indonezia ba dala 81, povu Indonezia ho Timor Leste (TL) hasae orasaun ba maluk sira neebe hetan sofrimentu tanba rai nakdoko iha Flores Nusa Tenggara Timur (NTT).
Enkarregadu Negosiu Embaixada Indonezia nian iha Dili, Raden Sakunto Paksi maka prezide direitamente orasaun nee, husu ba povu Indonezia neebe hela iha TL, hamutuk hasae orasaun ba dezastre naturais, rai nakdoko halakon povu balun nia vida, balun kanek todan, balun kanek kmaan no sofrimentu trauma oi-oin neebe povu flores oras nee hasoru.
“Mai ita hakruk hodi sasae ita nia orasaun ba Nai Maromak, harohan ba Flores, tuir idak-idak nia fiar no relijiaun, hasae ita nia orasaun ba ita nia maluk sira iha Flores neebe sofre ba rai nakdoko ho Scala Richet 7.7, barak rai no uma afatin lakon, balun lakon familia, ita harohan atu hakmaan sira nia sofrementu,” dehan Enkarregadu Negosiu Embaixada Indonezia nian iha Dili, Raden Sakunto Paksi iha serimonia area bandeira Nasional Indonezia neebe halao iha Embaixada Indonezia (KBRI) Dili Timor Leste, Segunda (17/08/2026).
Iha sorin seluk, Xefe Komisaun Organizadora ba Komemorasaun Loron Aniversariu Independensia Indonezia ba dala 81 iha KBRI Dili, Eka Putra Musa Mauboy iha serimonia area bandeira Indonezia nian, hatoo agradese ba entidades hotu, neebe apoiu serimonia isar bandeira nee no iha okaziaun nee mos antes ensera atividades komemorasaun loron boot Indonezia, hamutuk ho povu Indonezia no Timor Leste, hasae mos orasaun ba maluk sira husi Flores neebe hasoru dezastre husi rai nakdoko atu maromak hakman sira nia sofrimentu.
“Mai ita hasae orasaun ba maluk sira husi Flores neebe oras nee hasoru dezastre naturais rai nakdoko, ita reza ba sira nomos ba maluk sira hotu neebe ohin hasoru dezafiu no difikuldade boot nee, kanta knanaduk rai moris fatin neebe nunka haluha durante sei moris iha rai nee nia leten,” dehan nia.
Iha okaziaun nee, Francisca Ximenes nuudar sidadaun TL mos husu ba povu Timor oan tomak atu hasae orasaun ba maluk sira iha Flores neebe ohin loron hasoru dezastre husi rai nakdoko, atu nunee sira maromak tulun sira husi sofrementu neebe oras nee sira hasoru.
“Hau husu ba ita hotu atu hasae ita nia orasaun ba ita nia maluk sira iha Flores – NTT neebe oras nee hasoru hela sofrimentu husi rai nakdoko, ita ilha vizinhu neebe fahe husi tasi, vizinhu neebe besik liu, mai ita harohan ba maromak atu hakman sira nia sofrementu,” dehan nia.
(jos)
