DILI, STLTIMORLESTE.com – Prezidente Republika (PR), Jose Ramos Horta enkontru ho Ministeriu Negosiu Estranjeiru (MNE) Cabo Verde, Embaixador Manuel Amante Ds Rosa, hodi hametin liu tan relasaun rai rua iha futuru.
Bainhira remata halo enkontru, Ministeriu Negosiu Estranjeiru Cabo Verde, Embaixador Manuel Amante da Rosa ba jornalista sira iha Palasiu Prezidensial Nicolau Lobato, Bairo Pite, Tersa (18/08/2026) hatete, sente haksolok tebes mai halo enkontru ho Prezidente Republika Jose Ramos Horta hodi deskute hamutuk oinsa hametin relasaun bilateral rai rua iha Futuru.
“Nee vizita obrigatoriu, nia ema ida neebe hau admira tebes, neebe hau konhese dezde 1981, sira servisu ho Nasoins Unidas. No ho orgulhu boot mak ohin hau iha nee hasoru nia nuudar Prezidente Republika, no iha hau nia kapasidade nuudar Ministru Negosiu Estranjeiru no Ministru Defeza Nasional,” dehan Embaixador.
Nia hatete, relasaun Timor Leste ho Cabo Verde forte metin desde uluk too mai ohin loron, no agora ba oin sei hametin liu tan.
“Ita nia relasaun kontinua forte tebes iha formasaun Republika nasaun rua nian. Ita hahu relasaun sira nee atu lori ba independensia, neebe nasaun soberanu rua, neebe komanda respeitu iha nivel sub-rejional bainhira ita envolve, no ita mos iha kampu neebe luan ba. Loke konserteza tuir interese sira neebe ita iha konaba beleza iha sentidu ida nee. Hau lori ba Prezidente Ramos Horta dalan balu atu aprofunda no diversifika liutan relasaun sira entre Cabo Verde no Timor Leste. Ami haree ho ksolok tebes Polísia Militar nia abilidade atu kontinua iha dalan ida nee, neebe sei lori povu timoroan besik liutan ba povu kabu-verdianu,” katak nia.
Iha biban nee Prezidente Republika Jose Ramos Horta hatoo bemvindo ba Ministeriu Negosiu Estranjeiru Cabo Verde, Embaixador Manuel Amante Ds Rosa neebe ohin mai iha Palasiu Prezidensial Nicolau Lobato hodi deskute hamutuk oinsa hametin lasu amizade entre Timor Leste ho Cabo Verde iha futuru sai metin liu tan.
(eme)
