DILI, STLTIMORLESTE.com – CEO Aero Dili, Lourenço Oliveira hatete, seidauk iha serteza aviaun Aero Dili halo voo Dili – Kupang, tanba aviaun nia slot laiha.
Nia dehan, Governadór Nusa Tenggara Timur (NTT) fo konvite hodi konvida CEO Aero Dili, tanba iha intensaun hodi husu ba CEO atu halo aviaun Aero Dili semo Dili ba Kupang no Dili Darwin.
“Iha momentu nee hau dehan ba Governadór, ami aviaun nia Slot laiha ona, oras laiha ona para atu semo mai iha nee, neeba se ami atu semo karik hein tinan oin no karik ami aumenta tan aviaun ida para oras nee too para semo tan mai Kupang, se agora governadór hakarak semo sedu nee hau la aguenta. Mais imi fo dalan hau fo hatene ba Guvernadór, tanba iha Indonezia nee iha kompanhia boot ba Aviaun iha rua, iha Garuda ho Lion Grup, sira rua bele Semo Kupang – Dili no Kupang – Darwin,” hatete CEO Aero Dili, Lourenço Oliveira ba jornalista sira iha edifísiu Aero Dili Timor Plaza, Tersa nee (18/08/2026).
Nia informa, aviaun nee sei halo voo, maibe laos urjente hanesan governador nia hakarak nee, tanba seidauk iha akordu bilaterál ruma.
“Bainhira aviaun atu semo ba ema nia nasaun nee bilateral nee tenke iha, ezemplu aviaun semo mai dala ida ou Aero Dili mos semo mai, Citiling mos semo ba, se aumenta tan fatin seluk ita sei iha agreement entre nasaun rua nee tenke iha,” nia esplika.
Nia informa katak, informasaun neebe foin dadauk sai nes, Governadór rasik mak fo sai no sira husu ba Aero Dili katak, enkontru ida nee bele fo sai ba publiku.
“Hau hatan bele fo sai la problema. Momentu sira bolu hau ba nee laos hau ba mesak hau ba ho Ministeriu Trasporte nia ema ida,” nia deklara.
Nia tenik katak, Aero Dili sei Voo ba Kupang maibe laos urjente hanesan dadaun governadór husu nee.
“Ita nia aviaun rua deit halo nusa mak ita bele kobre fatin barak sera ke agora ita semo ba nasaun Xina, Singapura, Indonezia, Malazia no Australia, se ita halai tan ba kupang oras mak la too. Se tinan oin ita foti tan Aviaun ida nee ita bele semo ba Kupang,” nia koalia.
Lourenço hatutan, uluk laiha akordu bilaterál mós aviaun bele halo Voo, agora tente priense rekezitus sira foin bele halo voo, nunee bele iha igualdade ba sira nia aviaun ho Aero nian semo ba mai.
Nia haktuir, Governador NTT nia razaun atu voo ba nasaun tolu ne’e mais sira husu ona parte sira nian maibé ema ida seidauk halao tanba nee nia husu Aero Dili se bele karik halo operasaun ba Kupang.
Entretantu durante nee Aero Dili eziste, halo operasaun ba Xina, Indonezia Singapura ba dala rua Malazia ba dala tolu no Australia ba dala rua maibe banhira haree mos pasajeiru aumenta nes sei aumenta tan loron.
Depois Governu Timor Leste konserteza hein deit kuandu Aero Dili hakarak ba, sira tenke apoiu tanba loke tan liras ba fatin barak liu.
(jen)
