DILI, STLTIMORLESTE.com – Prezidente Republika (PR), Jose Ramos Horta ho Enkaregada Negosius Embaixada Emirados Arabes Unidos (EAU) haforsa lasu diplomatiku rai rua iha futuru.
Prezidente Republika, Jose Ramos Horta simu Shaima Salem Alhebsi, Enkaregada Negosius Embaixada Emirados Arabes Unidos (EAU) hodi diskute hamutuk oinsa haforsa lasu diplomatiku entre nasaun rua nee.
Bainhira remata hasoru malu, Enkaregada Negosius Embaixada Emirados Arabes Unidos (EAU) Shaima Salem Alhebsi ba Jornalista iha Palasiu Prezidensial Nicolau Lobato Bairru Pite Tersa (18/08/2026) hatete, iha sorumutu nee Enviada fo sai konaba vizita istorika dahuluk Ministru Estadu EAU nian ba Timor-Leste, neebe marka atu akontese iha fulan-agostu, hodi hatudu kompromisu forte husi governu EAU nian atu hametin liu tan relasaun bilateral.
Enviada nee mos fo hatene ba Xefe Estadu kona-ba resesaun amizade Timor Leste ho EAU neebe sei mai, no Prezidente Republika aseita ona atu onra eventu nee ho Ninia prezensa. Iha eventu nee sei iha serimonia espesial ida hodi fo premiu ba estudante timoroan sira neebe hatudu sira nia rai ho kriatividade liu husi projetu vídeu kolaborativu entre Embaixada EAU no Ministeriu Edukasaun.
“Hau kontente tebes hasoru sua exelensia, prezidente Republika Jose Ramos Horta, apresia tebes nia apoiu iha Emiradus Arabes Unidus nia belun diak ida ba Emiradus Arabes Unidus nomos povu Timur, ami apresia ita boot sira,” dehan Enkaregada Negosiu husi Embaixada Emirados Arabes Unidos, Shaima Salem Alheibsi.
Nia hatete, Ministru Estadu husi Emiradus Arabes Unidus neebe sei vizita mai Timor Leste hanesan vizita altu nivel. sei iha fulan-Agostu nia rohan no ida nee hatudu vontade atu hametin relasaun entre Timor Leste entre Emiradu Arabe Unidu,
Iha biban nee Prezidente Republika Jose Ramos Horta hatoo agradese no bemvindo ba Enkaregada Negosiu husi Embaixada Emirados Arabes Unidos, Shaima Salem Alheibsi neebe mai Timor Leste, liu liu ohin halo enkontru ho Prezidente rasik hodi hametin lasu amizade rai rua iha futuru.
Hodi hatoo ninia apresiasaun klean ba amizade no apoiu metin husi Prezidente, Alhebsi fo-sai katak parseria neebe buras entre nasaun rua nee laos deit iha nível governu ba governu, maibe mos too relasaun entre povu no fo kbiit ba foinsae sira iha Timor-Leste, hodi loke dalan ba projetu sira neebe fo fuan liutan iha futuru.
(eme)
